BAKI,AzerVoice, Orxan Qədirzadə
Avropa Komissiyasının üzvü, bərabərlik, hazırlıq və böhranların idarə olunması üzrə komissar Hacə Ləxbib sanksiyalar variantının hələ də gündəmdə olduğunu bildirib.
AzerVoice xəbər verir ki, Hacə Ləxbib Anadolu agentliyinə açıqlamasında 2025-ci ilin oktyabrında elan edilən atəşkəsə baxmayaraq, İsrailin hücumları nəticəsində 500-dən çox mülki şəxsin həlak olduğunu qeyd edib. O, sülh planının tam şəkildə qəbul edilməsinin və davamlı atəşkəs rejiminin təmin olunmasının vacibliyini vurğulayıb.
Ləxbib yanvarın 20-də İsrail qüvvələrinin Şərqi Qüdsdə BMT-nin Fələstinli Qaçqınlara Yardım Agentliyinin (BMT YQYA) qərargahına reyd keçirməsini, kompleksin ələ keçirilməsini və obyektlərin dağıdılmasını beynəlxalq hüququn açıq pozuntusu kimi qiymətləndirib. Onun sözlərinə görə, beynəlxalq hüquqdan kənarda qalmaq mümkün deyil və bu normalar hər yerdə eyni şəkildə tətbiq olunmalıdır.
Avrokomissar bildirib ki, Avropa İttifaqı atəşkəsin birinci mərhələsinin tam icrasını və bütün keçid məntəqələrinin açılmasını istəyir. Bu addımların Qəzza zolağına humanitar yardımın çatdırılması üçün həyati əhəmiyyət daşıdığı vurğulanıb.
Ləxbib qeyd edib ki, növbəti mərhələdə Qəzzanın bərpası və bütün Fələstin əraziləri üçün uzunmüddətli baxışın formalaşdırılması müzakirə olunmalıdır. Onun sözlərinə görə, təkcə Qəzzanın yenidən qurulması kifayət deyil, çünki humanitar yardım əzabları yalnız müvəqqəti azaldır və problemin həlli üçün daha genişmiqyaslı siyasi qərarlar tələb olunur.
Komissar həmçinin vurğulayıb ki, Fələstinlə bağlı istənilən müzakirə fələstinlilərin özlərinin iştirakı ilə aparılmalıdır. O, indiyədək fələstinlilərin sülh proseslərinə kifayət qədər cəlb olunmadığını bildirib.
İsrailə qarşı sanksiyalar mövzusuna qayıdan Ləxbib deyib ki, Avropa Komissiyası müxtəlif məhdudlaşdırıcı tədbirləri nəzərdən keçirib. Bununla belə, belə qərarların qəbulu üçün Aİ-yə üzv dövlətlər arasında konsensus tələb olunur və hazırda bu razılaşma əldə olunmayıb. Buna baxmayaraq, sanksiyalar məsələsi gündəmdə qalır.
Qeyd edək ki, Avropa Komissiyası daha əvvəl üzv ölkələrə İsrailə qarşı mümkün sanksiyalarla bağlı təkliflər təqdim edib. Müzakirə olunan variantlar arasında Aİ–İsrail Assosiasiya Sazişinin azad ticarətlə bağlı müddəalarının dayandırılması, gömrük rüsumlarının tətbiqi, eləcə də işğal olunmuş Fələstin ərazilərində torpaq zəbtində iştirak edən israillilərə qarşı məhdudiyyətlərin tətbiqi yer alır.
