BAKI,AzerVoice, Nailə Babazadə
Səudiyyə Ərəbistanı, İordaniya, Birləşmiş Ərəb Əmirlikləri, Qətər, İndoneziya, Pakistan, Misir və Türkiyənin xarici işlər nazirləri İsrailin işğal altındakı İordan çayının qərb sahilində torpaqları “dövlət torpağı” elan etməsi ilə bağlı qərarını kəskin şəkildə pisləyiblər.
AzerVoice xəbər verir ki, nazirlər, həmçinin 1967-ci ildən bəri ilk dəfə olaraq işğal altındakı geniş ərazilərdə torpaq mülkiyyətinin qeydiyyatı və rəsmiləşdirilməsi prosedurlarının təsdiqlənməsini də qınayıblar. Birgə bəyanatda bu addımların qeyri-qanuni məskunlaşma fəaliyyətini sürətləndirməyə, torpaq müsadirəsinə, İsrailin faktiki nəzarətini möhkəmləndirməyə və işğal altındakı Fələstin ərazilərində qanunsuz suverenlik tətbiqinə yönəlmiş “təhlükəli eskalasiya” olduğu bildirilib.
Açıqlamada vurğulanıb ki, bu qərarlar beynəlxalq hüququn və beynəlxalq humanitar hüququn, xüsusilə Dördüncü Cenevrə Konvensiyasının, eləcə də BMT Təhlükəsizlik Şurasının 2334 saylı qətnaməsi başda olmaqla müvafiq sənədlərin açıq şəkildə pozulmasıdır.
Nazirlər qeyd ediblər ki, qərar Beynəlxalq Ədalət Məhkəməsinin işğal altındakı Fələstin ərazilərində İsrailin siyasət və təcrübələrinin hüquqi nəticələri ilə bağlı məsləhət xarakterli rəyinə də ziddir. Həmin rəy işğal altındakı ərazilərin hüquqi, tarixi və demoqrafik statusunu dəyişdirməyə yönəlmiş tədbirlərin qanunsuzluğunu, işğalın sona çatdırılması öhdəliyini və zor tətbiq etməklə ərazi əldə etməyin yolverilməzliyini vurğulayır.
Birgə bəyanatda bildirilib ki, bu addım işğal altındakı torpaqlar üzərində nəzarəti möhkəmləndirməyə yönəlmiş yeni hüquqi və inzibati reallıq yaratmaq cəhdidir, iki dövlətli həll perspektivini zəiflədir, müstəqil və dayanıqlı Fələstin dövlətinin yaradılması imkanlarını azaldır və bölgədə ədalətli və hərtərəfli sülhə təhlükə yaradır.
Nazirlər işğal altındakı Fələstin ərazilərinin hüquqi, demoqrafik və tarixi statusunu dəyişdirməyə yönəlmiş bütün birtərəfli addımları qətiyyətlə rədd etdiklərini bir daha bəyan ediblər.
Onlar beynəlxalq ictimaiyyəti məsuliyyət daşımağa, pozuntulara son qoymaq üçün aydın və qəti addımlar atmağa, beynəlxalq hüquqa hörmətin təmin edilməsinə və Fələstin xalqının öz müqəddəratını təyinetmə hüququ, işğalın sona çatdırılması və 1967-ci il sərhədləri əsasında paytaxtı Şərqi Qüds olmaqla müstəqil və suveren dövlət qurmaq hüququnun qorunmasına çağırıblar.
