BAKI, VOA, Nailə Babazadə
Səudiyyə Ərəbistanının Hava Hücumundan Müdafiə qüvvələri son 24 saat ərzində Krallığın müxtəlif strateji hədəflərinə yönəlmiş 20 pilotsuz uçuş aparatı (PUA) və bir ballistik raketi zərərsizləşdirib.
VOA xəbər verir ki,Səudiyyə Müdafiə Nazirliyinin məlumatına görə, cümə günü axşam saatlarından başlayan hücum dalğası ölkənin Şərq vilayəti, Rub-əl-Xali səhrası və şimaldakı Əl-Cof bölgəsini əhal edib. Paytaxt Riyad yaxınlığındakı Şahzadə Sultan Hava Bazasına atılan ballistik raket isə hədəfə çatmadan vurulub.
Fevralın 28-dən bəri davam edən regional gərginlik dövründə Səudiyyə Ərəbistanı səmasında ümumilikdə 150-yə yaxın PUA və 25-dən çox raket məhv edilib. Hücumların mənşəyi rəsmən açıqlanmasa da, bu zərbələrin ABŞ və İsrailin İran ərazisinə hücumlarına cavab olaraq Tehran tərəfindən idarə olunduğu ehtimal edilir.
Hücumlar təkcə Səudiyyə Ərəbistanı ilə məhdudlaşmayıb. Bəhreyn rəsmiləri münaqişənin başlanğıcından bəri 121 ballistik raket və 193 PUA-nı zərərsizləşdirdiklərini bəyan ediblər. Qətər və Küveyt də öz hava məkanlarında bir neçə raket və PUA-nın uğurla vurulduğunu təsdiqləyib.
Birləşmiş Ərəb Əmirliklərində isə Dubay mərkəzində uğurlu müdafiə əməliyyatından sonra raket qəlpələrinin bir binanın fasadına düşdüyü bildirilib. Dubay Media Ofisi hadisə nəticəsində yanğın baş vermədiyini və xəsarət alanın olmadığını qeyd edərək vəziyyətin tam nəzarətdə olduğunu vurğulayıb.
