BAKI, VOA, Orxan Qədirzadə
ABŞ Prezidenti Donald Tramp İsrail Prezidenti İsxak Hersoqu tənqid edərək, onu "zəif və aciz" adlandırıb, həmçinin yalan danışmaqda ittiham edib. Trampın sözlərinə görə, Hersoq Baş nazir Benyamin Netanyahunu bağışlayacağına dair vəd versə də, bu öhdəliyi yerinə yetirməyib.
VOA xəbər verir ki, Prezident Tramp Hersoqun "lider olmadığını" bəyan edib. "O, mənə dəfələrlə onu (Netanyahunu) bağışlayacağını demişdi və yalan danışdı," – deyə ABŞ rəhbəri bildirib. Tramp həmçinin vurğulayıb ki, Netanyahuya qarşı aparılan məhkəmə prosesi hərbi əməliyyatlara mane olur və "Bibi" boş şeylərə deyil, müharibəyə diqqət yetirməlidir.
Trampın bu ittihamlarına İsrail tərəfindən cavab gecikməyib. Yüksək rütbəli İsrail rəsmisi yerli mediaya açıqlamasında Trampın sözlərini təkzib edib. Bildirilib ki, Prezident Hersoq heç vaxt belə bir vəd verməyib, sadəcə bu məsələyə qanun çərçivəsində baxıla biləcəyi ehtimalını dilə gətirib. Xatırladaq ki, Netanyahu korrupsiyada, siyasi və tənzimləyici qərarlar müqabilində mənfəət əldə etməkdə ittiham olunur.
İrana qarşı hərbi təzyiqlər fonunda Tramp bazar ertəsi günü verdiyi açıqlamada İranın enerji infrastrukturuna zərbələri 5 gün müddətinə təxirə saldığını elan edib. O, bu qərarı "yaxşı və məhsuldar dialoq" ilə əlaqələndirib.
Fevralın 28-dən başlayan hərbi əməliyyatlar nəticəsində İranda ən azı 1300 nəfərin həlak olduğu bildirilir. İran isə buna cavab olaraq regionun bir neçə ölkəsinə raket və PUA-larla zərbələr endirməkdə davam edib. Bu gərginlik fonunda Trampın İsrail rəhbərliyinə qarşı sərt tonu müttəfiqlər arasındakı daxili ixtilafları yenidən qabardıb.
