BAKI, VOA, Orxan Qədirzadə
Körfəz Əməkdaşlıq Şurasının (KƏŞ) Baş katibi Casem Albudayvi Ər-Riyadda xarici diplomatlarla keçirilən görüşdə İran ilə ABŞ və İsrail arasında yaşanan böhranın həlli istiqamətində aparılan danışıqlarda Körfəz dövlətlərinin mütləq iştirak etməli olduğunu bəyan edib. Albudayvi vurğulayıb ki, Körfəz ölkələri münaqişədən sonra Yaxın Şərqin xəritəsini yenidən cızmaq məqsədi daşıyan istənilən gizli sövdələşməni və ya birtərəfli tənzimləməni qətiyyətlə rədd edir.
VOA xəbər verir ki, Baş katib beynəlxalq birliyi İrana qarşı vahid mövqe nümayiş etdirməyə və Körfəz dövlətlərinə qarşı əsassız hücumların dərhal dayandırılmasını tələb etməyə çağırıb.
"İranın atdığı raketlərin 85 faizi Körfəz ölkələrini hədəf alıb"
Casem Albudayvi İranın son 25 gün ərzində həyata keçirdiyi hərbi təcavüzün miqyasına dair rəqəmlər açıqlayıb. O bildirib ki, bu müddət ərzində İran tərəfi 5 mindən çox ballistik raket və PUA-dan istifadə edib ki, bu hücumların 85 faizi birbaşa münaqişədə iştirak etməyən Körfəz ölkələrinə qarşı yönəlib. Baş katib Körfəz ölkələrinin hava hücumundan müdafiə sistemlərinin bu zərbələrin təsirini minimuma endirdiyini qeyd etsə də, bunun Tehranı məsuliyyətdən azad etmədiyini vurğulayıb. Albudayvinin sözlərinə görə, Körfəz dövlətləri ABŞ və İsrailin İrana zərbələrindən təəccübləniblər və əvvəlcədən Tehrana bu əməliyyatlarda iştirak etməyəcəkləri barədə zəmanət versələr də, İran tərəfi buna təcavüzlə cavab verib.
KƏŞ rəhbəri İranın Hörmüz boğazını bağlamasını, kommersiya gəmilərini ələ keçirməsini və qanunsuz tranzit rüsumları tətbiq etməsini "beynəlxalq hüququn kobud şəkildə pozulması" kimi xarakterizə edib. O xəbərdarlıq edib ki, Hörmüz boğazında baş verənlər yalnız regionla məhdudlaşmır və qlobal enerji bazarları üçün katastrofik nəticələrə yol açır. Körfəz ölkələri hazırda dünya xam neft hasilatının 22 faizini (gündəlik 16 milyon barel) təmin edir və qlobal neft ehtiyatlarının 33 faizinə sahibdir. Albudayvi qeyd edib ki, dəniz keçidlərinin bloklanması nəticəsində yaranacaq enerji çatışmazlığı, sığorta xərclərinin artması və mülki aviasiya sahəsindəki fasilələr bütün dünya iqtisadiyyatını çökdürə bilər.
Körfəz Əməkdaşlıq Şurası regional rəqabətlərin arenasına çevrilməyi və vətəndaşlarının hədəf alınmasını qəbul etməyəcəyini bəyan edib. Albudayvi vurğulayıb ki, Körfəzin məqsədi heç vaxt İranı məhv etmək və ya zəiflətmək olmayıb, hədəf qarşılıqlı hörmət və daxili işlərə qarışmamaq prinsipləri əsasında normal qonşuluq münasibətləri qurmaqdır. Hazırda diplomatik həll yolunu ən doğru seçim hesab edən KƏŞ dövlətləri, eyni zamanda beynəlxalq hüquq çərçivəsində öz təhlükəsizliklərini qorumaq üçün bütün digər variantları da nəzərdən keçirirlər.
