BAKI,VOA, Nailə Babazadə
2023-cü ilin oktyabr ayından etibarən İsrailin Qəzza zolağına həyata keçirdiyi aramsız hücumlar nəticəsində bölgədə ölənlərin sayı açıqlanıb.
VOA xəbər verir ki, Fələstin Sağlamlıq Nazirliyinin açıqladığı son məlumatlara görə, ötən müddət ərzində ölənlərin sayı 72 min 328 nəfərə, yaralıların sayı isə 172 min 184 nəfərə yüksəlib. Son 48 saat ərzində xəstəxanalara daha 11 nəfərin nəşi gətirilib, 26 yaralı isə müalicə altına alınıb.
Bölgədə 10 oktyabr tarixində elan edilən atəşkəs razılaşmasına baxmayaraq, İsrail ordusu tərəfindən ciddi pozuntular qeydə alınır. Məlumata görə, döyüş təyyarələri Bureyc qaçqın düşərgəsindəki polis mərkəzinə zərbələr endirib və nəticədə 6 nəfər həyatını itirib. Oxşar hücumlar Beyt Lahiya və Cibaliya qaçqın düşərgələrində də davam edib və burada da mülki şəxslər hədəf alınıb. Atəşkəsin qüvvəyə mindiyi tarixdən bu yana ümumilikdə 749 fələstinli həlak olub.
Humanitar böhranın ən ağır tərəfi isə səhiyyə sisteminin tamamilə iflic olmasıdır. Qəzzanın ən böyük tibb ocaqlarından olan Nasır Xəstəxanasında yanacaq və ehtiyat hissələrinin çatışmazlığı səbəbindən əsas generatorlardan biri sıradan çıxıb. Həkimlər kritik şöbələri elektrik enerjisi ilə təmin etmək üçün daha kiçik generatorlara keçsələr də, bu tədbirlərin müvəqqəti olduğu və xəstələrin həyatı üçün böyük risk yaratdığı bildirilir.
Şərqi Qüdsdə isə Fələstin ailələrinə qarşı "məcburi söküntü" siyasəti davam edir. İsrail hakimiyyəti tərəfindən tətbiq edilən yüksək pul cərimələri və söküntü xərcləri ilə təhdid edilən üç fələstinli qardaş, 30 il əvvəl inşa etdikləri və 25 nəfərin yaşadığı evlərini öz əlləri ilə sökmək məcburiyyətində qalıblar. Bu addım bölgədəki fələstinli varlığını sıxışdırıb çıxarmaq siyasətinin tərkib hissəsi kimi qiymətləndirilir.
