BAKI,VOA, Fərid Mikayılov

Suriya Prezidenti Əhməd Əş-Şəraa sabah Səudiyyə Ərəbistanı-na rəsmi səfər edəcək. Səfər çərçivəsində onun Məhəmməd bin Salman ilə görüşü planlaşdırılır.

VOA xəbər verir ki, görüş zamanı iki ölkə arasında ikitərəfli münasibətlərin inkişafı, həmçinin regional məsələlər üzrə əməkdaşlığın gücləndirilməsi müzakirə olunacaq.

Xüsusilə Yaxın Şərqdə təhlükəsizlik, siyasi sabitlik və koordinasiya məsələlərinin əsas gündəm mövzuları olacağı bildirilir.

Rəsmi açıqlamalara əsasən, bu səfər region ölkələri ilə əlaqələrin genişləndirilməsi istiqamətində aparılan diplomatik fəaliyyətin davamı kimi qiymətləndirilir.

Qeyd edək ki, Əhməd Əş-Şəraa daha əvvəl 2025-ci ilin oktyabr ayında da Səudiyyə Ərəbistanına səfər edib və Gələcək İnvestisiya Təşəbbüsü çərçivəsində yüksək səviyyəli görüşlər keçirib.

Analitiklər hesab edir ki, bu görüş Suriya ilə Səudiyyə Ərəbistanı arasında münasibətlərin yeni mərhələyə keçməsi baxımından əhəmiyyətli ola bilər.