BAKI,VOA, Nailə Babazadə
Qətər Əmiri Şeyx Təmim bin Həməd Al Sani çərşənbə günü Dohada Suriya Prezidenti Əhməd əl-Şaraa ilə regional və beynəlxalq proseslərin müzakirə edildiyi rəsmi görüş keçirib.
VOA xəbər verir ki,Şeyx Təmim bu səfərin iki ölkə arasında müxtəlif sektorlar üzrə əməkdaşlığı gücləndirəcəyinə və əlaqələri daha da genişləndirəcəyinə ümid etdiyini bildirib.
Prezident əl-Şaraa Suriyanın hər iki xalqın ortaq maraqlarına xidmət edəcək şəkildə ikitərəfli münasibətləri inkişaf etdirmək əzmində olduğunu vurğulayıb. Suriya lideri İranın bölgədəki ölkələri və Qətəri hədəf alan hücumlarından sonra Doha ilə həmrəy olduqlarını ifadə edib. O Qətərin öz suverenliyini təhlükəsizliyini və vətəndaşlarını qorumaq üçün atdığı bütün addımları dəstəklədiklərini bəyan edib.
Görüş zamanı liderlər regional sabitliyin dəstəklənməsi istiqamətində öhdəliklərini bir daha təsdiqləyib və ikitərəfli əlaqələrin gələcək inkişaf yollarını nəzərdən keçiriblər. Müzakirələrdə Qətərin Baş naziri və Xarici İşlər naziri Şeyx Məhəmməd bin Əbdülrəhman bin Casim Al Sani həmçinin Suriyanın Xarici İşlər naziri Əsad əl-Şeybani və digər yüksək rütbəli rəsmilər iştirak ediblər.
Rəsmi qəbuldan sonra Şeyx Təmim və Əhməd əş-Şaraa arasında təkbətək görüş baş tutub və qarşılıqlı maraq doğuran məsələlər ətrafında fikir mübadiləsi aparılıb. Suriya Prezidenti körfəz turuna çərşənbə aqşamı Səudiyyə Ərəbistanında vəliəhd şahzadə Məhəmməd bin Salman ilə görüşərək başlayıb. Bu səfərlər Suriyanın bölgədəki diplomatik mövqeyini yenidən qurmaq cəhdlərinin bir hissəsi kimi qiymətləndirilir.
