BAKI,VOA, Orxan Qədirzadə

Türkiyə, Səudiyyə Ərəbistanı, Pakistan və daha 5 ölkə İsrailin Məscidül-Əqsa ilə bağlı addımlarını kəskin şəkildə pisləyib.

VOA xəbər verir ki, Türkiyə, Misir, İordaniya, İndoneziya, Pakistan, Qətər, Səudiyyə Ərəbistanı və Birləşmiş Ərəb Əmirliklərinin xarici işlər nazirləri birgə bəyanat yayıblar.

Bəyanatda İsrailin Qüdsdə müsəlman və xristian müqəddəs məkanlarının tarixi və hüquqi statusuna qarşı təkrarlanan pozuntuları, xüsusilə İsrail rəsmiləri və məskunlaşanların polis müşayiəti ilə Məscidül-Əqsaya daxil olması və ərazidə İsrail bayrağının qaldırılması qınanıb.

Nazirlər bu addımları beynəlxalq hüququn və beynəlxalq humanitar hüququn açıq pozuntusu, dünya müsəlmanlarına qarşı qəbuledilməz təxribat kimi qiymətləndiriblər.

Bəyanatda Məscidül-Əqsanın bütün ərazisinin yalnız müsəlmanlara məxsus ibadət məkanı olduğu vurğulanıb və İordaniya Vəqflər Nazirliyinə bağlı Qüds Vəqfləri İdarəsinin bu məkanın idarə olunmasında yeganə qanuni qurum olduğu bildirilib.

Nazirlər həmçinin İsrailin yeni yaşayış məntəqələrini təsdiqləməsini və işğal altındakı İordan çayının qərb sahilində fələstinlilərə qarşı artan zorakılığı pisləyiblər.

Bəyanatda beynəlxalq ictimaiyyətə İsrailin qanunsuz addımlarını dayandırmaq və işğal altındakı ərazilərdə gərginliyin qarşısını almaq üçün məsuliyyət daşıdığı xatırladılıb.

Nazirlər Fələstin xalqının öz müqəddəratını təyin etmək və paytaxtı Şərqi Qüds olan müstəqil dövlət qurmaq hüququna dəstəklərini bir daha təsdiqləyiblər.