BAKI,VOA Orxan Qədirzadə

İsrail hökumətinə yaxın mənbələr Qəzza ilə bağlı yeni və mübahisəli planların gündəmdə olduğunu göstərən məlumatlar yayıb.

VOA xəbər verir ki, İsrailin baş naziri Benyamin Netanyahunun beynəlxalq məsələlər üzrə müşaviri Karolin Qlikin Qəzza sakinlərinin başqa ölkələrə köçürülməsi ilə bağlı təşəbbüslər irəli sürdüyü iddia olunur.

Məlumata görə, Qlik bu istiqamətdə Konqo Demokratik Respublikası və “Somaliland” kimi tanınan separatçı bölgə ilə əlaqələr qurmağa çalışsa da, bu təşəbbüslər nəticəsiz qalıb.

Bildirilir ki, sözügedən addımlar ABŞ prezidenti Donald Tramp tərəfindən irəli sürülmüş və Qəzzanın gələcəkdə turizm zonasına çevrilməsini nəzərdə tutan planla əlaqələndirilir. Bu plan çərçivəsində əhalinin üçüncü ölkələrə köçürülməsi ideyası “könüllü miqrasiya” adı altında təqdim olunur.

Mənbələr qeyd edir ki, İsrail tərəfi bu konsepsiyanı praktiki mərhələyə keçirmək üçün müxtəlif diplomatik kanallardan istifadə edib. Bununla yanaşı, region ölkələri və fələstinli tərəflər bu cür təşəbbüslərə kəskin etiraz edir.

Eyni zamanda vurğulanır ki, Qəzzada davam edən hərbi əməliyyatlar, infrastrukturun dağıdılması və humanitar vəziyyətin ağırlaşması bölgəni faktiki olaraq yaşayış üçün yararsız hala gətirir ki, bu da “köçürülmə” ideyasının əsaslandırılması kimi təqdim olunur.

Analitiklər hesab edir ki, bu cür planlar beynəlxalq hüquq, suverenlik və insan hüquqları baxımından ciddi mübahisələr doğurur və regionda gərginliyi daha da artırmaq potensialına malikdir.