BAKI,VOA,Yusif Şərifzadə
Beynəlxalq Enerji Agentliyinin (IEA) rəhbəri Fatih Birol xəbərdarlıq edib ki, Yaxın Şərqdən yeni ixrac həcmlərinin azalması və yay mövsümündə artan yanacaq tələbi fonunda ehtiyatların tükənməsi səbəbiylə qlobal neft bazarı iyul və ya avqust aylarında “qırmızı zona”ya daxil ola bilər.
VOA xəbər verir ki, Birol vəziyyətdən çıxış yolunu İran müharibəsindən əvvəl dünya neft və qaz tədarükünün təxminən beşdəbirinin keçdiyi əsas körfəz su yolu olan Hörmüz boğazının tam şəkildə açılmasında görür.
IEA mart ayında müharibə ilə əlaqədar artan qiymətlərin qarşısını almaq məqsədilə üzv ölkələrin strateji ehtiyatlarından 400 milyon barel neftin bazara buraxılması barədə razılığa gəlmişdi. Lakin ehtiyatların tədricən azalması səbəbindən Birol lazım gəldikdə yeni ehtiyat buraxılışlarını koordinasiya etməyə hazır olduqlarını bildirib.
