BAKI,VOA,Yusif Şərifzadə
İsrail ordusu Livanın cənubunda yerləşən Sur şəhərinin Zuqaq əl-Mufdi məhəlləsinin sakinlərinə ərazini tərk etmələri barədə xəbərdarlıq edib.
VOA xəbər verir ki, İsrail ordusunun ərəbdilli sözçüsü Avixay Adrai sosial şəbəkədə yaydığı açıqlamada sakinləri Zəhrani çayının şimal hissəsinə keçməyə çağırıb.
Onun sözlərinə görə, həmin əraziyə qarşı hərbi əməliyyat planlaşdırılır.
Adrai iddia edib ki, əməliyyatın hədəfi Hizbullah qüvvələridir. Lakin o, mümkün hücumun nə vaxt həyata keçiriləcəyi barədə məlumat verməyib.
Son aylarda baş vermiş oxşar hadisələrdə təxliyə çağırışlarından qısa müddət sonra hava zərbələrinin endirildiyi müşahidə olunub.
Təxliyə xəbərdarlığı İsrail və Hizbullah arasında son günlər yenidən yüksələn gərginlik fonunda edilib.
Livanın cənub bölgələrində təhlükəsizlik vəziyyətinin mürəkkəb olaraq qaldığı, bölgədə yeni hərbi əməliyyatlarla bağlı narahatlıqların artdığı bildirilir.
