BAKI,VOA,Yusif Şərifzadə
İsrail ordusu Qəzza zolağının cənubundakı Xan Yunis bölgəsində HƏMAS komandirlərindən biri olduğunu bildirdiyi Ənəs Mahmud Əhməd Həmdanın öldürüldüyünü açıqlayıb.
VOA xəbər verir ki, İsrail ordusunun yaydığı bəyanata görə, əməliyyat İsrailin daxili təhlükəsizlik xidməti Şin Bet ilə birgə həyata keçirilib.
İsrail tərəfi iddia edir ki, Ənəs Mahmud Əhməd Həmdan HƏMAS-ın yüksək vəzifəli rəhbərlərinin yaxın silahdaşı olub və təşkilat daxilində mühüm rol oynayıb.
Bəyanatda onun Qəzza zolağında saxlanılan girovlarla bağlı fəaliyyətə rəhbərlik etdiyi, həmçinin onların İsrailə qaytarılması prosesində əsas fiqurlardan biri olduğu irəli sürülüb.
İsrail ordusunun məlumatına görə, Həmdan cümə axşamı günü keçirilən əməliyyat zamanı öldürülüb.
HƏMAS isə İsrailin bu iddiasına və Həmdanın öldürüldüyü barədə açıqlamaya hələlik rəsmi münasibət bildirməyib. Məlumat müstəqil mənbələr tərəfindən də təsdiqlənməyib.
