BAKI, AzerVoice
Türkiyənin Enerji və təbii sərvətlər naziri Alparslan Bayraktar Azərbaycanın Avropaya qaz ixracını iki dəfə artırmaq niyyətində olduğunu və bu məqsəd üçün infrastrukturun tam hazır vəziyyətdə olduğunu bildirib.
AzerVoice xəbər verir ki, nazir
Bayraktar Azərbaycanın rəsmi AZTV kanalına verdiyi açıqlamada,
Türkiyə ilə Azərbaycanın enerji sahəsindəki əməkdaşlığının dünyaya
nümunə olduğunu qeyd edib.
O, Bakı-Tbilisi-Ceyhan boru kəmərinin dünya bazarına gündə 700 min
barel neft çıxardığını və bunun qlobal enerji bazarında balans
yaratdığını vurğulayıb.
Bayraktar, Xəzər dənizindən çıxarılan qazın TANAP və TAP boru kəmərləri vasitəsilə Avropaya nəql edildiyini və bu infrastrukturun 2027-ci ilə qədər Azərbaycanın qaz ixracını iki dəfə artırmağa imkan verəcəyini bildirib. O, Xəzərdə qaz hasilatına yatırımların artırılmasının vacibliyini vurğulayaraq, Türkiyənin həm böyük bir təbii qaz bazarı olduğunu, həm də artan sənaye və əhali səbəbilə uzunmüddətli qaz tədarükü öhdəliklərini yerinə yetirəcəyini bəyan edib.
İzmirdə keçiriləcək IV Azərbaycan-Türkiyə Enerji Forumuna toxunan Bayraktar, burada İğdır-Naxçıvan təbii qaz boru kəmərinin də müzakirə ediləcəyini bildirib. Onun sözlərinə görə, bu layihə Naxçıvanın qaz təminatını gücləndirəcək və regional enerji təhlükəsizliyinə töhfə verəcək. Forumda hökumətlərarası görüşlər keçiriləcək, həmçinin enerji sektoruna sərmayə qoymaq istəyən xarici şirkətlər də dəvət olunacaq.
Bayraktar Azərbaycanın bərpa olunan enerji potensialına da diqqət çəkərək, Xəzər dənizinin dənizüstü külək enerjisi sahəsində qeyri-adi potensiala malik olduğunu bildirib. O, yaşıl enerjinin bazara və istehlakçılara çatdırılmasının vacibliyini vurğulayıb və artıq bu sahədə yeni layihələrin gündəmdə olduğunu açıqlayıb.
Qeyd edək ki, nazir Bayraktar COP24 konfransında müzakirə olunan “Yaşıl Enerji Dəhlizi” layihəsinə də toxunaraq, Türkiyə, Gürcüstan, Bolqarıstan və Azərbaycanın birgə enerji layihələrini genişləndirmək niyyətində olduğunu bildirib. Cənub Qaz Dəhlizinə paralel olaraq elektrik enerjisi xəttinin əlavə olunması ilə Azərbaycan və Türkiyə arasında enerji əməkdaşlığı yeni bir mərhələyə qədəm qoyacaq.
