Bakı, AzerVoice

Cənubi Koreyanın 4,5 nəsil KF-21 Boramae döyüş təyyarəsi Avropanın müdafiə şirkəti MBDA tərəfindən istehsal edilən "Meteor" adlı uzun mənzilli hava raketi ilə təchiz ediləcək.

AzerVoice xəbər verir ki, Cənubi Koreyanın Müdafiə Alma Proqramı İdarəsi (DAPA) MBDA ilə imzaladığı müqavilə çərçivəsində 100 ədəd Meteor raketinin ölkəyə gətiriləcəyini bildirib.

Bu yenilik ölkənin müdafiə gücünü artırmaq və təyyarəni müasir texnologiya ilə təmin etmək məqsədi daşıyır. Bu raketlər KF-21 döyüş təyyarələrinin ilk istehsal mərhələsi üçün nəzərdə tutulub.

Ötən il Meteor raketləri ilə sınaq uçuşlarını uğurla həyata keçirən KF-21 döyüş təyyarəsinin Cənubi Koreya Hərbi Hava Qüvvələrində (ROKAF) 2026-cı ilin sonuna qədər istifadəyə verilməsi planlaşdırılır. 2023-cü ilin iyulunda təyyarənin 20 ədədinin istehsalına başlanıb. KAI və DAPA arasında imzalanan və 1,41 milyard ABŞ dolları dəyərində olan müqavilə bu təyyarə layihəsində əhəmiyyətli bir mərhələdir.

Cənubi Koreyanın yeni KF-21 Boramae döyüş təyyarələri üçün tələb olunan mühərriklər Hanwha Aerospace tərəfindən təmin ediləcək. Şirkət, 20 təyyarədən ibarət ilk partiya üçün 40 General Electric F414-GE-400 mühərrikini istehsal etməyi öz öhdəsinə götürüb. Ilk mühərrikin 2025-ci ilə qədər Çanqvondakı istehsal müəssisəsində tamamlanması gözlənilir.

Cənubi Koreya, köhnəlmiş F-4 Phantom və F-5 döyüş təyyarələrini əvəz etmək məqsədilə 2032-ci ilə qədər 100-120 KF-21 Boramae döyüş təyyarəsini inventarına əlavə etməyi planlaşdırır. Bu təyyarələr Avropa istehsalı olan və radarla idarə edilən “Meteor” raketləri ilə təchiz olunacaq. 200 km uçuş məsafəsinə malik Meteor raketi Beyond Visual Range (BVR) xüsusiyyətinə sahibdir və Eurofighter Typhoon, Gripen, Rafale və F-35 kimi müxtəlif döyüş təyyarələri ilə uyğunlaşır.