Bakı, AzerVoice
Kanadada evtanaziya ilə ölüm halları artmağa davam edir.
AzerVoice xəbər verir ki, 2016-cı ildə
qanuniləşən tibbi yardımla ölüm nisbəti 2023-cü ildə 4,7 faizə
çataraq təqribən 15 300 insanın həyatına son qoyması ilə
nəticələnib.
Bu rəqəm əvvəlki ilə nisbətən 16 faiz artım göstərsə də, əvvəlki
illərdəki 31 faiz orta artım ilə müqayisədə azalma müşahidə edilib.
Bu yavaşlamanın səbəbi hələ dəqiq müəyyən edilməyib.
Evtanaziya tələb edənlərin 96 faizi təbii ölümün qaçılmaz olduğu xəstələrdən ibarət olub, qalan 4 faiz isə xroniki xəstəliklər səbəbilə bu prosedura müraciət edib. Tələb edənlərin orta yaşı 77 olub, əsas tibbi vəziyyətlər arasında isə xərçəng birinci yerdədir.
Hesabatda etnik fərqlərə də diqqət çəkilib. Belə ki, evtanaziya yolu ilə həyatına son qoyanların 96 faizi ağdərili insanlar olub, onları 1,8 faizlə Şərqi Asiyalılar izləyib. Etnik qruplar arasındakı bu fərqin səbəbi hələ dəqiq məlum deyil.
Kvebek əyaləti ölkə üzrə evtanaziya nisbətinin ən yüksək olduğu yer olaraq qeydə alınıb. Əhalisinin yalnız 22 faizinə sahib olan bu əyalət, ümumi evtanaziya hallarının 37 faizinə ev sahibliyi edib. Kvebek hökuməti yüksək göstəricilərin səbəblərini araşdırmaq üçün təhqiqat başladıb.
Kanada evtanaziya nisbətləri baxımından dünya üzrə yüksək səviyyədə olsa da, ümumi ölümlərin 5 faizini təşkil edən Hollandiyadan geri qalır.
Evtanaziya təcrübəsi 2021-ci ildən terminal diaqnozu olmayan, lakin çətin şərtlər səbəbindən həyatlarına son qoymaq istəyən şəxslər üçün də açıqdır. 2024-cü ildə bu prosedurun ruhi xəstəlikləri olan şəxsləri də əhatə etməsi planlaşdırılsa da, səhiyyə sistemi ilə bağlı narahatlıqlar səbəbindən bu genişləndirmə təxirə salınıb.
Buna baxmayaraq, bəzi mübahisəli hallar geniş ictimai müzakirələrə səbəb olub. Məsələn, kimyəvi maddələrə həssaslıq səbəbindən sığınacaq ehtiyacını ödəyə bilməyən bir qadının evtanaziya tələbinin qəbul edilməsi və qeyri-adekvat mənzil şəraitinə görə evtanaziyanı düşünən əlillər ilə bağlı hallar medianın diqqət mərkəzində olub.
Kanadada Xristian beyin mərkəzi Cardus bu rəqəmləri “narahatedici” adlandırıb və ölkənin dünyada ən sürətlə böyüyən evtanaziya proqramlarından birinə sahib olduğunu bildirib.
