BAKI, AzerVoice
İran Trampın məktubunu araşdırdığını və müvafiq kanallar vasitəsilə cavab verəcəyini bildirib.
AzerVoice xəbər verir ki, İran Xarici İşlər Nazirliyinin sözçüsü İsmayıl Bekayi Trampın ölkə lideri Xamneyiyə yazdığı məktubun məzmununun onun ictimai bəyanatlarından fərqlənmədiyini və yayılan xəbərlərin əsaslı olmadığını vurğulayıb.
Həftəlik mətbuat konfransında jurnalistlərin suallarını cavablandıran Bekayi, məktubun hazırda dərc olunmasının mümkün olmadığını və İranın bu məsələ ilə bağlı rəsmi mövqeyini araşdırmalar bitdikdən sonra açıqlayacağını bildirib. O qeyd edib ki, məktubun məzmunu Trampın əvvəlki çıxışlarının davamıdır və yeni bir element daşımır.
Bekayi əlavə edib ki, İran məktubu nəzərdən keçirir və buna uyğun cavabı diplomatik kanallar vasitəsilə verəcək. O, həmçinin xarici işlər naziri Abbas Erakçinin Omana səfərinin bu məktubla əlaqəli olmadığını bildirib.
Nüvə məsələsinə toxunan Bekayi İranın təhdid və təzyiq altında ABŞ ilə danışıqlar aparmayacağını bir daha vurğulayıb.
Qeyd edək ki, ABŞ və İran arasında münasibətlər xüsusilə nüvə sazişindən sonra gərginləşib. Vaşinqtonun sanksiyaları və Tehranla dialoqa dair mövqeyi bu münasibətlərin gələcəyinə təsir edən əsas amillərdən biridir.
