BAKI, AzerVoice
ABŞ prezidenti Donald Tramp Çinin ABŞ-dan idxal olunan bütün məhsullara tətbiq edəcəyi yeni gömrük rüsumları ilə bağlı qərarını böyük bir səhv kimi qiymətləndirib.
AzerVoice-un məlumatına görə, Tramp bəyan edib ki, Çin panikaya düşüb və səhvə yol verib.
“Çin səhv addım atdı, panikaya düşdü, bu isə onun özünə yol verə bilməyəcəyi bir haldır!” – deyə Vaşinqton administrasiyasının rəhbəri Truth Social platformasında etdiyi paylaşımda deyib. O, bu barədə əlavə təfərrüat təqdim etməyib.
Qeyd edək ki, Çinin Dövlət Şurasının Tarif Komissiyasının daha əvvəl verdiyi bəyanata görə, Çin höküməti 10 aprel tarixindən etibarən ABŞ-dan idxal edilən bütün məhsullara əlavə 34%-lik gömrük rüsumları tətbiq edəcək. Bu addım Trampın tətbiq etdiyi yeni rüsumlara cavab olaraq atılıb.
“ABŞ-ın hərəkətləri beynəlxalq ticarət qaydalarına ziddir, Çinin qanuni hüquq və maraqlarını ciddi şəkildə pozur və birtərəfli təhdidin tipik nümunəsidir,” – deyə bəyanatda qeyd olunub.
Komissiya əlavə edib ki, bu tariflər mövcud rüsumlara əlavə olaraq tətbiq ediləcək.
Keçən ilin statistikasına əsasən, Çin ilə ABŞ arasında ticarət dövriyyəsi 688,28 milyard dollara çatıb. Bu məbləğin 163,62 milyard dolları ABŞ-dan Çinə ixrac olunan malların payına düşür – bu isə Çindən ABŞ-a ixrac edilən malların həcminin təxminən üçdə biri qədərdir.
Xatırladaq ki, Tramp aprelin 2-də 185 ölkəyə aid məhsullara gömrük rüsumları tətbiq edəcəyini açıqlayıb. O, idxal olunan mallara minimum 10% rüsum tətbiq ediləcəyini bildirib. Ayrı-ayrı ölkələr üçün fərdi tariflər müəyyən olunub. Xüsusilə Çin mallarının idxalına 34% rüsum tətbiq ediləcək.
