Bakı, AzerVoice:
Beynəlxalq Ədalət Məhkəməsinin “Rəfahdəki hücumların dayandırılması” ilə bağlı qərarına baxmayaraq İsrailin hələ də Qəzzada hücumlara davam etməsi dünya ictimayyəti tərəfindən etirazla qarşılanıb. İsrailin Rəfahda məcburi köçkün kimi yerləşən fələstinlilərin yaşadığı çadırları bombalaması Venesuela və Kolumbiya liderləri tərəfindən “qətliam” kimi qəbul edilib.
AzerVoice xəbər verir ki, Rafahda evlərindən didərgin düşmüş fələstinlilərin sığındığı çadır şəhərciyinə İsrailin həyata keçirdiyi hücum bir çox ölkə, beynəlxalq qurum və təşkilatlar tərəfindən ciddi qınaq atəşinə tutulub.
Böyük Britaniyanın xarici işlər naziri Devid Kemeron Rəfahdakı hücumun "çox narahatlıq" doğurduğunu və bu hadisə ilə bağlı təhqiqatın tez bir zamanda tamamlanmalı olduğunu bildirib.
Fransa prezidenti Emmanuel Makron bir daha İsraili Rəfaha olan hücumlarını dayandırmağa çağırıb.
Venesuela prezidenti Nikolas Maduro İsrailin dünyanın gözü qarşısında Qəzzada “qətliam” törətdiyini bildirib. O, ABŞ və Avropa İttifaqının bu qətliam qarşısında susduğunu bildirib. Maduro Hitler dövründən bəri bəşəriyyətin şahidi olduğu ən dəhşətli soyqırımlardan birinin baş verdiyini əlavə edib.
Kolumbiya prezidenti Qustavo Petro da fələstinlilərə qarşı hücumları əsas gətirərək İsraillə diplomatik əlaqələri rəsmi olaraq kəsdiklərini açıqlayıb. O, qətliama səssiz qalan ölkələri tənqid edib.
Pakistan, Meksika və Maldiv adaları da hücumu pisləyib. Beynəlxalq hüququ pozan İsraildən Beynəlxalq Ədalət Məhkəməsinin qərarlarına əməl etməsi tələb olunub.
İsrailin mülki şəxslərə qarşı hücumlarının dayandırılması üçün Birləşmiş Millətlər Təşkilatının Təhlükəsizlik Şurasından da lazımi addımların atılması tələb olunub.
Afrika Birliyi də hücumu pisləyib və dərhal atəşkəsə çağırıb. Xüsusilə İsrailin əməllərinin cəzasız qaldığı vurğulanıb.
Qeyd edək ki, mayın 7-də İsrail ordusu Qəzzanın Rəfah bölgəsinə qurudan hücum edərək Misirlə sərhəd qapısının Qəzza tərəfini ələ keçirdiyini açıqlayıb.
Beynəlxalq Ədalət Məhkəməsinin qərarına baxmayaraq, İsrail mayın 26-da Rafahda məcburi köçkün fələstinlilərin çadırlarını bombalayıb və 23-ü qadın, uşaq və qoca olmaqla ən azı 45 fələstinli həyatını itirib, 249 fələstinli isə yaralanıb.
