Bakı, AzerVoice
Çin İsrailin Livanın cənubundakı bir kəndə hava zərbəsi endirməsindən narahatlıq duyduğunu bildirərək, mülki əhaliyə zərər vuran istənilən hərəkəti pisləyib.
AzerVoice xəbər verir ki, bu barədə Çin Xarici İşlər Nazirliyinin sözçüsü Lin Cien gündəlik mətbuat konfransında İsrailin Livanın cənubuna hücumu ilə bağlı sualları cavablandıran zaman danışıb.
Sözügedən hücumdan dərin narahatlıq keçirdiyini vurğulayan Lin, gərginliyin qarşısını almaq üçün müvafiq tərəfləri sakitliyə və təmkinli olmağa çağırıb.
Sözçü Lin qeyd edib ki, Çin mülki şəxslərə zərər vuran istənilən hərəkəti pisləyir.
Dünənki mətbuat konfransında Lin həmçinin, HƏMAS Siyasi Bürosunun sədri İsmayıl Həniyyənin öldürülməsinin bölgədəki nəticələrini dəyərləndirərərək, Yaxın Şərqi gərginliyin azaldılmasına çağırıb.
Lin Çinin regionda sülhü qorumaqda qərarlı olduğunu və uzunmüddətli sabitliyin təmin edilməsi üçün müvafiq tərəflərlə işləməyə hazır olduğunu bildirib.
Qeyd edək ki, dünən İsrail ordusu Livanın cənubundakı Şema şəhərində bir evə hava hücumu həyata keçirib. Hücum zamanı 4 nəfər ölüb, 5 nəfər yaralanıb, suriyalı ailənin yaşadığı bir evin isə tamamilə dağıldığı bildirilib.
Hava hücumundan sonra bölgəyə çoxlu sayda təcili yardım maşını gələrək, mülki müdafiə qrupları dağıntılar altında axtarış-xilasetmə işlərini davam etdiriblər.
