Bakı, AzerVoice
Əfqanıstan İslam Əmirliyinin sözçüsü Qəzza ilə bağlı verilən sualları cavablandırıb.
AzerVoice xəbər verir ki, 5Pillars media şirkətinin jurnalisti Dilly Hüseyni Əfqanıstan İslam Əmirliyinin sözçüsü Zabihullah Mücahiddən müsahibə alıb.
Mücahidə Qəzza ilə bağlı sual da ünvanlanıb. Jurnalist tərəfindən verilən "İslam Əmirliyi Qəzzada müsəlmanlara kömək etmək üçün nə edir?" sualını ətraflı şəkildə cavablandıran Mücahid, Qəzzanın bütün İslam dünyasının məsələsi olduğunu deyib.
"Biz uzun illərdir davam edən İsrail vəhşiliyini pisləyirik və bunun bir an əvvəl bitməsini istəyirik. Biz İsraili qəsbkar bir rejim hesab edirik, çünki onlar orda yaşayan insanların mülklərini zəbt etdilər və işğal olunmuş yerlərdə güc və qəddarlıq tətbiq edərək yaşamağa davam edirlər",-deyə danışıb.
İsraili dəstəkləyən ölkələrin də bu dəstəklərini dayandırmağa çağıran Mücahid, əks təqdirdə onların da İsrailin işlədiyi cinayətlərdə ortaq sayılacağını deyib.
"Bizlər Müsəlman qardaşlarımızla birliyimizi və dəstəyimizi nümayiş etdiririk. Biz İslam dünyasını İsrailin vəhşiliyini dayandırmaq üçün bir araya gəlməyə və güclü addım atmağa dəvət edirik. İslam Əmirliyi də bu mövzuda üzərinə düşən vəzifələri ən yaxşı şəkildə yerinə yetirəcəkdir. Qəzzaya diplomatik dəstək vermək üçün də əlimizdən gələnin ən yaxşısını edəcəyik.",- deyə o əlavə edib.
Qəzzanın coğrafi baxımdan onlardan çox uzaq bir bölgə olduğunu və ora çıxışlarının olmadığını deyən Mücahid, "Biz dünyaya çağırış edirik ki, Qəzza məsələsi İslam dünyasının bir savaşıdır və eyni zamanda bu müharibə insanlığı əlaqələndirən bir məsələ kimi qəbul edilməlidir və qlobal miqyasda bütün dövlətlər bunu dayandırmaq üçün bir araya gəlməlidir”,-deyə ifadə edib.
Mücahid həmçinin jurnalistin "İsraili dayandırmaq üçün atılmalı olan addımlara hərbi müdaxilə də daxildirmi?" sualına verdiyi cavabda, "Müharibənin dayandırılması və İsrailin qəsbkar işğalına son qoyulması üçün təsirli addımlara ehtiyac var. Əlbəttə ki, mümkünsə, bu addım siyasi dialoq yolu ilə atılmalıdır. İslam dünyası müharibəyə girəcək gücdə deyil. Belə ki, ABŞ və NATO - nun İsraili dəstəklədiyini görürük”,-deyə ümumi bir savaşın mümkünlüyünü istisna edib.
Sözlərinə davam edən Mücahid, “Biz Qəzzada soyqırımı dayandırmaq və İsrail qəsbkarlığının qarşısını almaq üçün bütün təsirli vasitələrdən istifadə olunmasını istəyirik”,- deyə qeyd edib.
