Bakı, AzerVoice
Rusiya keçən il Çin mühərrikləri və hissələrini istifadə edərək Garpiya-A1 adlı yeni uzun mənzilli hücum (kamikadze) pilotsuz uçan aparatı istehsal etməyə başladığı və bu dronlardan Ukraynadakı müharibədə istifadə etdiyi iddia edilir.
AzerVoice xəbər verir ki, bu haqda Avropalı bir kəşfiyyat xidmətinin iki mənbəsi və ingilis mediasının nəzərdən keçirdiyi sənədlər əsasında məlumat yayılıb.
Yeni pilotsuz təyyarənin istehsal müqaviləsini, istehsal prosesi ilə bağlı şirkət yazışmalarını və maliyyə sənədlərini ortaya qoyan kəşfiyyat, Rusiyanın dövlət silah istehsalçısı Almaz-Antey-in törəməsi olan IEMZ Kupol-un 2023-cü ilin iyul ayından 2024-cü ilin iyul ayına qədər 2500 ədəddən çox Qarpiya istehsal etdiyini göstərir.
Çin texnologiyasını ehtiva edən yeni rus pilotsuz təyyarəsinin mövcudluğu barədə əvvəllər məlumat verilməyib.
İEMZ Kupol və Almaz-Antey iddialarla bağlı sualları cavablandırmayıb.
Vaşinqtonda yerləşən “Yeni Amerika Təhlükəsizliyi Mərkəzi”nin baş elmi işçisi Samuel Bendet Reuters agentliyinə bildirib ki, Garpiya təsdiqlənərsə, bu, Rusiyanın uzun mənzilli pilotsuz uçuş aparatları üçün İrandan asılılığının aradan qalxması deməkdir.
“Əgər bu realdırsa, bu, Rusiyanın indi daha çox yerli istehsala və Çinə daha çox arxalana biləcəyini göstərir, çünki bu müharibədə hər iki tərəf də dron istehsalı üçün bir çox Çin komponentlərindən asılıdır”, - deyə o bildirib.
Qeyd edək ki, Rusiya Müdafiə Nazirliyi bu xəbərlə bağlı sualları cavablandırmayıb. Çin Xarici İşlər Nazirliyi Reuters-ə verdiyi açıqlamada, "Pekin pilotsuz uçuş aparatları da daxil olmaqla potensial hərbi istifadə edilmə imkanı olan məhsulların ixracına ciddi nəzarət edir",- deyə qeyd edib.
“Ukrayna böhranı ilə bağlı Çin həmişə sülh danışıqlarını və siyasi həlli təşviq etməkdə qərarlı olub”, - bəyanatda deyilir.
Bəyanatda həmçinin qeyd olunub ki, Çinin Rusiya ilə ticarətində heç bir beynəlxalq məhdudiyyət yoxdur.
NATO-nun baş katibi Yens Stoltenberq ötən həftə Çini Rusiyanın Ukraynadakı müharibəsinə dəstəyi dayandırmağa çağırıb və bəyan edib ki, Pekinin yardımı münaqişənin davam etməsində mühüm amildir.
