BAKI, AzerVoice
İranın ali rəhbəri Əli Xamenei ABŞ-a Omanda keçirilən dolayı danışıqlar ilə bağlı xəbərdarlıq edib.
AzerVoice xəbər verir ki, Xamenei hökumət, parlament və məhkəmə orqanlarının rəsmilərindən bir qrupunu qəbul edərkən bildirib ki, ölkənin məsələləri hazırda aparılan danışıqlarla əlaqələndirilməməlidir.
"İslam Respublikasının və qarşı tərəfin qırmızı xətləri tamamilə aydındır" - deyə, o bildirib.
O həmçinin qeyd edib ki, Oman vasitəçiliyi ilə aparılan danışıqlar İran Xarici İşlər Nazirliyinin həyata keçirdiyi onlarla missiyadan yalnız biridir. Xamenei vurğulayıb ki, 2015-ci il nüvə sazişində buraxılan səhv təkrarlanmamalıdır.
Xatırladaq ki, aprelin 12-də Omanda İranın nüvə proqramı ilə bağlı İran və ABŞ nümayəndə heyətləri arasında dolayı danışıqlar aparılıb. İran Xarici İşlər Nazirliyinin sözçüsü İsmayıl Bəqai bildirib ki, tərəflər nüvə proqramı və qeyri-qanuni sanksiyaların qaldırılması ilə bağlı hökumətlərinin mövqelərini qarşılıqlı hörmət və konstruktiv atmosferdə bildiriblər. İran nümayəndə heyətinin üzvü bildirib ki, aparılan məsləhətləşmələr ümumilikdə uğurlu keçib.
Danışıqların növbəti mərhələsi apelin 20-də keçiriləcək.
Bundan əvvəl, ABŞ prezidenti Donald Tramp ötən ay İran lideri Ayətullah Əli Xameneiyə məktub göndərərək birbaşa nüvə danışıqları aparmağı təklif etsə də, Tehran yalnız dolayı danışıqlara açıq olduğunu, təhdid və təzyiqlər altında birbaşa görüşləri qəbul etmədiyini bildirmişdi.
