BAKI, AzerVoice
ABŞ Prezidenti Donald Tramp, Vatikan şəhərində Papa Fransiskin dəfn mərasimi öncəsi Ukrayna Prezidenti Volodimir Zelenski ilə görüşməzdən əvvəl, Fransa Prezidenti Emmanuel Makrondan getməsini istəyib.
AzerVoice xəbər verir ki, bu barədə "The Sun" qəzeti məlumat yayıb.
Bundan əvvəl Tramp və Zelenskinin Papa Fransiskin dəfn mərasimindən əvvəlki görüşünün görüntüləri yayımlanmışdı. Kadrlarda üç stul görünür, onlardan biri Vatikan işçiləri tərəfindən aparılır. Daha sonra kadra Makron daxil olur və onunla ABŞ lideri arasında qısa bir dialoq yaşanır. Videoda səs olmadığı üçün danışılanlar eşidilmir.
"The Sun" qəzeti bu görüntülərin təhlili üçün professional dodaq oxuma mütəxəssisi cəlb edib. Qəzet mütəxəssisin sözlərini belə çatdırır: "O (Tramp) Makrona deyir: '<...> mənə bir yaxşılıq etməlisən, burada olmamalısan'".
Mütəxəssis Tramp və Zelenski arasında olan söhbəti də analiz edib. Onun sözlərinə görə, Zelenski Trampa belə deyib:
"Mən istəyərdim ki, siz bunu edəsiniz, amma bu şəkildə yox". Tramp isə cavab olaraq bu təklifi "çox maraqlı bir strategiya" adlandırıb.
Xatırladaq ki, ötən gün Vatikanda, Papa Fransiskin dəfn mərasimindən əvvəl, Trampın Zelenski ilə görüşü baş tutub. Görüş təxminən 15 dəqiqə davam edib.
