BAKI, AzerVoice
Pakistanın müdafiə naziri müharibə bəyanatının təhrif olunduğunu bildirib.
AzerVoice xəbər verir ki, Pakistanın
müdafiə naziri Xavaja Məhəmməd Asif Hindistanla mümkün müharibəyə
dair açıqlamasının yanlış mühakimə edildiyini bildirib.
Nazir, "3-4 günün önəmini vurğuladım, lakin müharibənin bu müddətdə
başlaya biləcəyini demədim", – deyə vurğulayıb.
Asif qeyd edib ki, Hindistanla münasibətlərdə gərginlik artsa da, yaxın günlərdə müharibənin başlayacağı ilə bağlı konkret proqnoz verməyib. “Əgər müharibəyə məcbur edilərsə, ölkəmiz uyğun şəkildə cavab verəcək” – deyə o bildirib.
Nazir həmçinin Hindistanın Cammu və Kəşmirin Pahalqam bölgəsindəki terror aktına dair Pakistanın birgə istintaq təklifinə cavab verməməsindən məyusluğunu ifadə edib.
Hindistanın hakim Bharatiya Janata Partiyasının parlament üzvü Nişikant Dubey isə media qarşısında iddia edib ki, 2025-ci ilin sonuna qədər Pakistan “dörd ayrı bölgəyə” bölünəcək. Onun sözlərinə görə, Pakistanın nəzarətində olan Kəşmir bölgəsi geri alınacaq və ölkə Bəlucistan, Pəncab və Puştunistan kimi hissələrə parçalanacaq. Dubey bu planın Hindistanın Baş naziri Narendra Modi tərəfindən həyata keçiriləcəyini iddia edib.
Qeyd edək ki, aprelin 22-də Hindistanın nəzarətindəki Cammu və Kəşmir bölgəsinin Pahalqam rayonunda silahlı şəxslərin turistlərə hücumu nəticəsində 26 nəfər həlak olub. Hindistan hücumun arxasında Pakistanın dayandığını iddia edib, İslamabaddakı Pakistanlı müşavirləri ölkədən çıxarıb, viza xidmətlərini dayandırıb və bütün öncə verilmiş vizaları ləğv edib.
Pakistan bu ittihamları rədd edərək cavab tədbirləri görüb – Hindistanla ticarət əlaqələrini dayandırıb, hava məkanını bağlayıb və diplomatik heyət sayını məhdudlaşdırıb. Rəsmi İslamabad “Hind Suları Müqaviləsi”ndən kənar çaylara müdaxilənin müharibə aktı kimi qiymətləndiriləcəyini bəyan edib.
