BAKI, AzerVoice
Kanadada 15-17 iyun tarixləri arasında keçiriləcək Yeddilik Qrupu (G7) sammitində iştirak edəcək ölkələrin liderləri ABŞ Prezidenti Donald Tramp ilə digər ölkə liderləri arasında fikir ayrılıqlarını qabartmamaq üçün yekun birgə bəyanat qəbul etməkdən imtina edə bilərlər.
AzerVoice xəbər verir ki, bu barədə Yaponiyanın "Nikkei" iqtisadi qəzeti məlumat yayıb.
Nəşrin verdiyi məlumata görə, birgə bəyanat əvəzinə yeddi ayrı sənədin qəbul edilməsi planlaşdırılır. Bu sənədlərdə faydalı qazıntılar, süni intellekt, infrastruktur və miqrasiya problemləri kimi sahələrdə əməkdaşlıq məsələlərinin əks olunacağı gözlənilir. Sənədlərdə qlobal ticarət və Rusiya ilə əlaqələr kimi məsələlərin müzakirə olunmayacağı ehtimal edilir, çünki qəzetin fikrincə, Tramp və digər liderlər arasında bu mövzular üzrə dərin fikir ayrılıqları mövcuddur.
Qeyd edək ki, 2018 və 2019-cu illərdə Trampın ilk prezidentliyi dövründə keçirilən G7 sammitlərində yekun bəyanat qəbul etməkdə ciddi çətinliklər yaşanmışdı.
