BAKI, AzerVoice
İsrailin müdafiə naziri İsrael Katz, İranla İsrail arasında artan gərginlik fonunda Hizbullahı açıq şəkildə hədələyib. O bildirib ki, Hizbullah Tel-Əviv ilə Tehran arasında gedən qarşıdurmaya qarışarsa, İsrail bu təşkilatı məhv edəcək.
AzerVoice xəbər verir ki,Katz bu açıqlamanı Hizbullahın baş katibi Naim Qasımın son bəyanatına cavab olaraq sosial media hesabında paylaşıb. Qasım, İsrailin İrana qarşı hücumlarına münasibət bildirərək Təbrizin tərəfində olduqlarını və bu vəziyyətdə neytral qalmayacaqlarını demişdi.
İsrail naziri keçmiş Hizbullah liderləri Həsən Nasrullah və
Haşim Safiyuddinə qarşı həyata keçirilmiş sui-qəsdləri xatırladaraq
bildirib:
“Hizbullahın baş katibi sələflərindən dərs çıxarmayıb.”
Katz iddia edib ki, Naim Qasım İranın göstərişləri əsasında İsraili hədələyir və bu səbəbdən Hizbullahın ehtiyatlı davranmalı olduğunu, əks halda İsrailin artıq səbir nümayiş etdirməyəcəyini qeyd edib.
O, açıq şəkildə bildirib ki, əgər Hizbullah İranla İsrail arasındakı qarşıdurmaya qoşulsa və hücumlar həyata keçirsə, İsrail bu təşkilatı tamamilə məhv etmək üçün hərbi gücündən istifadə edəcək.
Xatırladaq ki, dünən Hizbullah lideri Naim Qasım bəyan edib ki, İsrailin İran əleyhinə hücumları qarşısında Təbranın yanında olmaq onların vəzifəsidir. Hizbullahın rəsmi açıqlamasında da İranın ali lideri Əli Hamaneyə qarşı hər hansı sui-qəsdin ağır nəticələrə yol aça biləcəyi vurğulanıb.
Qeyd edək ki, iyunun 13-də İsrail İranın müxtəlif şəhərlərindəki nüvə obyektlərini, eləcə də ordunun yüksək komandanlığını hədəf alan irimiqyaslı hücumlara başlayıb.
Hücumlarda İranın Baş Qərargah rəisi, İnqilab Keşikçiləri Korpusunun Baş Komandanı, bəzi yüksək səviyyəli komandirlər və 9 nüvə alimi həlak olduğu halda, mülki itkilərin ümumi sayının 224 olduğu açıqlanıb.
İran ordusunun İsrailə ballistik raketlərlə cavab verməsi nəticəsində 25 nəfərin öldüyü, 500-dən çox insanın yaralandığı bildirilib.
İran Səhiyyə Nazirliyinin iyunun 15-də verdiyi açıqlamaya görə, İsrailin İrana qarşı hücumları nəticəsində azı 224 nəfər ölüb, 1277-dən çox adam yaralanıb.
Başda Türkiyə olmaqla bir çox ölkə İsraili qınayıb.
