BAKI, AzerVoice
Almaniyada təxminən 20 siyasətçi və mədəniyyət xadimi, kansler Fridrix Mersin İsrailin İrana qarşı hərbi əməliyyatları ilə bağlı verdiyi açıqlamalara görə ona qarşı prokurorluğa şikayət ərizəsi təqdim edib.
AzerVoice xəbər verir ki, bu haqqda Almaniyanın “Berliner Zeitung” qəzeti məlumat verib.
Məlumata əsasən, şikayət ərizəsi Almaniya Baş Prokurorluğuna və Berlin Prokurorluğuna ünvanlanıb. Sənədi imzalayanlar arasında rəssamlar, musiqiçilər, o cümlədən publisist Patrik Baab (BSW – “Sara Vagenknext Birliyi – Ağıla və Ədalətə görə” hərəkatının üzvü) və Avropa Parlamentində BSW-ni təmsil edən Mixael fon der Şulenburq da var. Onlar kanslerin açıqlamalarına hüquqi qiymət verilməsini tələb edirlər.
Şikayətçilər qeyd edir ki, Fridrix Mers beynəlxalq anlaşma ideyasını və sülh prinsipini pozub. Hər iki prinsip Almaniya Konstitusiyasında təsbit olunub. Onlar kanslerin İsrailin baş naziri Benyamin Netanyahunun “İranın nüvə bombasının hazırlanmasının qarşısını aldıq” açıqlamasını sitat gətirdiyini, lakin ABŞ-ın kəşfiyyat orqanlarının bu iddianı təsdiqləmədiyini vurğulayıblar.
“Netanyahu 2002-ci ildən bəri, yəni 23 ildir ki, İranın nüvə silahına sahib olmağa yaxın olduğunu iddia edir” - deyə, ərizədə qeyd olunub.
Bundan başqa, ərizədə Mers nasist leksikasından istifadə etməkdə ittiham olunur. İctimaiyyət nümayəndələri onun sözlərini nasist SS zabiti Auqust Hefnerin Babiy Yar qırğınları zamanı dediklərinə bənzədirlər. Hefner həmin cinayətləri “çirkli iş” adlandırmışdı.
Xatırladaq ki, Mers 18 iyun tarixində “ZDF” kanalına, İsrailin İrana qarşı əməliyyatları ilə bağlı açıqlama vermişdi.
“Bu, İsrailin bizim hamımız üçün etdiyi çirkli bir işdir” - deyə, Mers bildirib. O, həmçinin İsrail ordusu və rəhbərliyinə hörmətlə yanaşdığını vurğulamışdı.
Həmçinin xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.
Bu hücumlara cavab olaraq isə İran Ordusu İsrailə qarşı "Həqiqi vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
