Səudiyyə Ərəbistanı və Almaniya xarici işlər nazirləri səviyyəsində strateji dialoq mexanizminin yaradılması barədə razılığa gəlib. Tərəflər həmçinin regional təhlükəsizlik, naviqasiya azadlığı və ikitərəfli münasibətlərin inkişafını müzakirə ediblər.
ArabAZ xəbər verir ki,Səudiyyə Ərəbistanının xarici işlər naziri şahzadə Feysəl bin Fərhan və Almaniyanın xarici işlər naziri İohann Vadeful Berlin şəhərində görüşüblər. Görüş zamanı iki ölkə arasında uzunmüddətli münasibətlər və müxtəlif sahələrdə əməkdaşlığın gücləndirilməsi yolları nəzərdən keçirilib.
Nazirlər regionda son hadisələri, beynəlxalq su yollarının təhlükəsizliyi və naviqasiya azadlığının təmin edilməsinin vacibliyini müzakirə ediblər. Tərəflər Hörmüz boğazında vəziyyətin normallaşdırılmasının regional təhlükəsizliyə və sabitliyə, eləcə də beynəlxalq ticarətin fasiləsizliyinə töhfə verəcəyini vurğulayıblar.
Görüşdə regional və beynəlxalq böhranların diplomatik və sülh yolu ilə həlli səylərinə də dəstək ifadə olunub.
Tərəflər iqtisadi və ticarət əlaqələrini, iki ölkə arasında ticarət dövriyyəsini və müxtəlif sektorlarda əməkdaşlıq və investisiya imkanlarının genişləndirilməsi yollarını da müzakirə ediblər.
Görüşün sonunda Feysəl bin Fərhan və İohann Vadeful Səudiyyə Ərəbistanı və Almaniya hökumətləri arasında xarici işlər nazirləri səviyyəsində strateji dialoqun yaradılmasına dair anlaşma memorandumu imzalayıblar. Mexanizmin iki ölkə arasında məsləhətləşmə və koordinasiyanı gücləndirməsi, eləcə də ikitərəfli əlaqələrin müxtəlif istiqamətlər üzrə inkişafına xidmət etməsi nəzərdə tutulur.
