BAKI, AzerVoice
Trampın elan etdiyi atəşkəsdən sonra İsrail daxilində “Qəzzanı da əhatə etməlidir” çağırışları səslənib.
AzerVoice xəbər verir ki, ABŞ Prezidenti Donald Trampın vasitəçiliyi ilə elan edilən və İsrailin də təsdiqlədiyi İsrail-İran atəşkəsindən sonra Qəzzada da hərbi əməliyyatların dayandırılması ilə bağlı ictimai təzyiqlər artmaqdadır.
İsrailin ana müxalifət partiyası “Gələcək Buradadır” (Yesh Atid) lideri Yair Lapid sosial media hesabında “İndi növbə Qəzzadadır. Burada işləri bitirmək, əsirləri geri gətirmək, müharibəni sona çatdırmaq vaxtıdır. İsrail yenidən qurulmalıdır” - deyə yazıb.
Qəzza zolağında saxlanılan israilli məhbusların ailələrinin bir araya gəldiyi platformada yayılan bəyanatda da Trampın İranla əldə edilən atəşkəs təşəbbüsünün Qəzzanı da əhatə etməli olduğu bildirilib. “İrana görə 12 gecə yuxusuz qalan İsrail xalqı, Qəzzada əsir olanlar üçün də eyni həssaslığı göstərməlidir” - deyə Açıqlamada qeyd olunub.
Qeyd olunur ki, hazırda Qəzzada təxminən 50 israilli məhbusun olduğu güman edilir, onlardan 20-nin öldüyü ehtimal olunur.
Digər tərəfdən, İsrailin İrana qarşı hücumlarını dayandırması fonunda Qəzza zolağında davam edən hərbi əməliyyatların artıq 627 gündür fasiləsiz şəkildə davam etdiyi vurğulanır. Beynəlxalq təşkilatlar bölgədəki intensiv bombardman, aclıq, məcburi köçkünlük və infrastrukturun dağılması səbəbilə ciddi humanitar fəlakət yaşandığını bildirir.
Qeyd edək ki, İsrailin Qəzzadakı hərbi əməliyyatlarına görə Beynəlxalq Ədalət Məhkəməsində “soyqırım” ittihamı ilə iş aparılır. Eyni zamanda, Beynəlxalq Cinayət Məhkəməsi İsrailin Baş naziri Benyamin Netanyahu və keçmiş müdafiə naziri Yaov Gallant barəsində “müharibə cinayətləri və insanlığa qarşı cinayətlər” ittihamları ilə həbs qərarı çıxarıb.
ABŞ Prezidenti Tramp isə səhər saatlarında sosial şəbəkədə paylaşdığı mesajında, “Atəşkəs qüvvəyə minib, xahiş edirəm onu pozmayın” deyə çağırış edib.
