BAKI, AzerVoice

Ağ Ev ABŞ-ın bəzi ölkələrlə ticarət sazişləri üzrə danışıqlarının 9 iyul tarixində başa çatmalı olan son müddətdən sonra da davam edə biləcəyini istisna etmir.

AzerVoice xəbər verir ki, bu barədə CBS telekanalına açıqlamasında Ağ Evin Milli İqtisadi Şurasının rəhbəri Kevin Hasset məlumat verib.

“Amerika Birləşmiş Ştatları dünyada baş verən bütün məsələlər barədə hər kəslə danışmağa daim hazırdır. Əlbəttə, son tarix mövcuddur. Bəzi məsələlər artıq yekunlaşmaq üzrədir. Bu səbəbdən, bəzi danışıqların müddətinin uzadılması mümkündür, amma bu baş verməyə də bilər. Sonda bu məsələdə qərarı prezident verir” – deyə, Hasset bildirib. O, bu açıqlamanı ABŞ-ın xarici ölkələrlə ticarət tariflərinin tətbiqini müvəqqəti dayandırmaq barədə qərarının uzadılıb-uzadılmayacağı ilə bağlı suala cavab olaraq verib.

Qeyd edək ki, ABŞ prezidenti Donald Tramp iyul 1-də bəyan etmişdi ki, ticarət tariflərinin qüvvəyə minməsinin növbəti dəfə təxirə salınmasını nəzərdən keçirmir.