BAKI,AzerVoice
Səudiyyə Ərəbistanı Nazirlər Şurası, vəliəhd şahzadə Məhəmməd bin Salmanın sədrliyi ilə Ciddə şəhərində keçirilən iclasında, qeyri-səudiyyəlilərin daşınmaz əmlak əldə etməsinə dair yenilənmiş qanunu təsdiqləyib. Yeni sistem 2026-cı ilin yanvarından qüvvəyə minəcək.
AzerVoice xəbər verir ki, bunu ölkənin bələdiyyə və mənzil naziri Macid əl-Huqayl açıqlayıb. Onun sözlərinə görə, bu qərar daşınmaz əmlak sektorunu inkişaf etdirməyə və birbaşa xarici investisiyaları təşviq etməyə yönəlib. Yeni qanun, eyni zamanda, investorları və daşınmaz əmlak inkişafı ilə məşğul olan şirkətləri Səudiyyə bazarına cəlb etməklə əmlak təklifini artırmağı hədəfləyir.
Nazir əlavə edib ki, sistem səudiyyəlilərin maraqlarını qorumağa
yönəlmiş mexanizmlərlə təmin olunub və bazarın tarazlığını saxlamaq
məqsədilə xüsusi prosedurlar müəyyən edilib. Yeni qanun iqtisadi və
investisiya aspektlərini də nəzərə alır.
Əcnəbilərə mülkiyyət hüququ yalnız müəyyən coğrafi bölgələrdə,
xüsusilə Ər-Riyad və Ciddə şəhərlərində veriləcək. Məkkə və Mədinə
üçün isə ayrıca şərtlər tətbiq olunacaq.
Yenilənmiş sistemə əsasən, Əmlak üzrə Baş İdarə qeyri-səudiyyəlilərin daşınmaz əmlak əldə edə biləcəyi bölgələrin təyin olunması üçün məsul qurum olacaq. Qurum 180 gün ərzində icra mexanizmlərini və tətbiq qaydalarını əks etdirən icra mexanizmini “İstişarə” platformasında dərc edəcək.
Yeni sistem “Xüsusi İqamə” (Yaşama izni) qanunu, Körfəz Əməkdaşlıq Şurası vətəndaşlarının daşınmaz əmlak sahibi olmasına dair qaydalar və digər müvafiq qanunvericiliklə uzlaşır. Bu çərçivədə əcnəbilərə mülkiyyət və digər əmlak hüquqları əldə etməyə imkan verən hüquqi mexanizmlər təqdim olunacaq.
