BAKI, AzerVoice
Kanada heç vaxt ABŞ-nin 51-ci ştatına çevrilməyəcək.
AzerVoice-un məlumatına görə, bu barədə Kanada xarici işlər naziri Anita Anand Yaponiyanın NHK telekanalına verdiyi müsahibədə bildirib.
“Kanada heç vaxt ABŞ-nin 51-ci ştatı olmayacaq. Və nöqtə” – deyə, o vurğulayıb. Nazirin bu sərt reaksiyası ABŞ prezidenti Donald Trampın daha əvvəl səsləndirdiyi təkliflərə cavab olaraq verilib.
Qeyd edək ki, Tramp bir neçə dəfə bəyan etmişdi ki, Kanadanın bir çox vətəndaşı ölkələrinin ABŞ-nin 51-ci ştatına çevrilməsini istəyir. Onun fikrincə, bu birləşmə Kanadaya iqtisadi sabitlik gətirəcək və onu, xüsusilə Rusiya və Çin kimi xarici təhlükələrdən qoruyacaq.
Kanadanın baş naziri Mark Karni isə dəfələrlə bəyan edib ki, ölkəsi heç bir şəraitdə və heç bir formada ABŞ-nin tərkibinə daxil olmayacaq.
İyun ayının sonunda ABŞ prezidenti yenidən bu ideyanı gündəmə gətirmişdi. Onun sözlərinə görə, Kanada tam şəkildə ABŞ-dən asılıdır, əksinə, Birləşmiş Ştatlar Kanada ilə heç bir asılılıq içində deyil.
