BAKI, AzerVoice

İsrailli fəallar ABŞ konsulluğu qarşısında Qəzzadakı “humanitar vəqf”ə etiraz ediblər.

AzerVoice xəbər verir ki, İsrailin sol təmayüllü “Azad Qüds” fəalları Qərbi Qüdsdə yerləşən ABŞ konsulluğu qarşısında ABŞ və İsrailin birgə dəstəklədiyi Qəzza Humanitar Vəqfinin fəaliyyətinə qarşı etiraz aksiyası keçirib.

Təxminən 30 nəfərin iştirak etdiyi nümayişdə “Soyqırımı maliyyələşdirməyi dayandırın”, “Etnik təmizləməyə yox”, “Atəşkəs indi” kimi plakatlar və şüarlar səsləndirilib. Fəallar İsrailin Rəfahda “humanitar şəhər” adı ilə yaratmaq istədiyi mərkəzlərin əslində “toplama düşərgələri” olduğunu bildiriblər.

Aksiya zamanı nümayişçilər 7 oktyabr hadisələrindən əvvəl İsraildə çalışmış və hazırda Qəzzada ailəsi ilə birlikdə sağ qalmağa çalışan fələstinli Tarikin göndərdiyi mesajları da oxuyublar. “Dörd gündür çörək yoxdur. Uşaqlarımın aclığını azaltmağa çalışıram, amma artıq heç nə edə bilmirəm. Yardım mərkəzinə getdim və orada ölüm gördüm.” - deyə o bildirib.