BAKI, AzerVoice
Macarıstan, Aİ-nin Qəzza zolağındakı hərbi əməliyyatlara görə İsrailə qarşı sanksiyalar tətbiq etməsi təşəbbüsünü dəstəkləməyəcək.
AzerVoice xəbər verir ki, bu barədə Macarıstanın xarici işlər və xarici iqtisadi əlaqələr naziri Peter Siyarto israilli həmkarı Gideon Saar ilə telefon danışığından sonra bəyanat verib.
Siyarto bildirib ki, Macarıstan İsraillə HƏMAS arasında atəşkəs və girovların - o cümlədən bir macar vətəndaşının azad olunması barədə razılığa ümid edir. Onun fikrincə, mövcud vəziyyətdə dialoqa ehtiyac daha da artıb.
Nazir qeyd edib ki, iyulun 15-də Brüsseldə keçiriləcək Aİ ölkələrinin xarici işlər nazirlərinin görüşündə Aİ–İsrail Assosiasiya Şurasının fəaliyyətinin aktivləşdirilməsinə çağırış edəcək. “Bu baxımdan Macarıstan hələ də Avropa İttifaqının israilli vətəndaşları sanksiya siyahısına salmasına qarşıdır” – deyə, Siyarto "Facebook" sosial şəbəkəsində yazıb.
Qeyd edək ki, daha əvvəl "Euractiv" portalı, diplomatik mənbələrə istinadən, Avropa diplomatiyasının rəhbəri Kaya Kallasın 15 iyul tarixli toplantıda İsrailə qarşı məhdudlaşdırıcı tədbirlərin variantlarını təqdim edəcəyini bildirmişdi. Brüsseldə müzakirə olunan ssenarilər arasında Aİ–İsrail Assosiasiya Sazişinin tam və ya qismən dayandırılması, israilli məmurlara, hərbçilərə və köçkünlərə qarşı sanksiyalar, ticarət məhdudiyyətləri, İsrailə silah embarqosu və elmi-texniki əməkdaşlığın dayandırılması da var.
Assosiasiya Sazişinin dayandırılması yalnız Aİ ölkələrinin yekdil qərarı ilə mümkündür. Mənbələrin fikrincə, ən real ssenari İsrailə qarşı fərdi şəxslərə yönəlik sanksiyalar olacaq – bu yolu daha əvvəl Avstraliya, Böyük Britaniya, Kanada, Yeni Zelandiya və Norveç seçmişdi.
