Mask Trampı Epşteyn işi ilə bağlı sənədləri dərc etməyə çağırıb

İlon Mask ABŞ prezidenti Donald Trampı maliyyəçi Ceffri Epşteyn işi ilə bağlı sənədləri dərc etməyə çağırıb.

AzerVoice xəbər verir ki, bu barədə Mask "X" sosial şəbəkəsində yazıb.

“O (Tramp – red.) Epşteynin adını bir neçə dəfə çəkdi, halbuki əvvəllər çağırış etmişdi ki, artıq bu mövzuda danışılmasın. Sadəcə sənədləri paylaşın – necə ki, söz vermişdiniz” - deyə, Mask bildirib.

Bu, Maskın Epşteyn işi ilə bağlı məlumatların açıqlanmasını tələb etməsi ilə bağlı ilk çağırışı deyil. O, bildirib ki, əgər Ağ Ev bu sənədləri dərc etməsə, ABŞ prezidentinə inanmaq çətin olacaq.

Qeyd edək ki, iyulun 6-da “Axios” portalı ABŞ Ədliyyə Nazirliyi və Federal Təhqiqatlar Bürosunun (FTB) Epşteynin nüfuzlu şəxsləri şantaj etməsi, onun müştərilərinin siyahısının mövcudluğu və ya onun qətl edilməsi ilə bağlı ehtimalları təsdiqləyəcək sübutlar tapmadığını bildirmişdi. Ağ Evin mətbuat katibi Kerolayn Livitt isə brifinq zamanı bildirib ki, Ədliyyə naziri tərəfindən daha əvvəl qeyd olunan “müştərilər siyahısı” əslində mövcud deyil.

Bununla belə, Donald Tramp və onun komandası seçki kampaniyası çərçivəsində dəfələrlə Epşteyn işi üzrə istintaq sənədlərini məxfi statusdan çıxaracaqlarına və bu məsələdə maksimum şəffaflıq təmin edəcəklərinə söz veriblər.

Xatırladaq ki, Ceffri Epşteyn 2019-cu il iyulun 6-da Nyu-York ştatının hüquq-mühafizə orqanları tərəfindən saxlanılmışdı. Prokurorluq bəyan etmişdi ki, 2002–2005-ci illərdə o, Manhettendəki evində ən azı 14 yaşında olan onlarla yeniyetmə qızı qəbul edərək istismar edib. Epşteynin dostları və tanışları arasında yalnız ABŞ-dan deyil, bir sıra başqa ölkələrdən də fəaliyyətdə olan və istefada olan siyasətçilər, keçmiş dövlət başçıları, sahibkarlar və şou-biznes ulduzları olub.

Epşteynə qarşı cinayət işi onun 2019-cu il 10 avqust tarixində həbsxana kamerasında intihar etməsindən sonra dayandırılıb.