BAKI, AzerVoice
Malayziyada siyasətçilər ABŞ prezidenti Donald Trampın ölkəyə səfir təyin etmək istədiyi Nik Adamsın namizədliyinə qarşı çıxıblar.
AzerVoice xəbər verir ki, bu barədə "The Star" qəzeti məlumat yayıb.
Məlumata görə, bu etirazlara səbəb Adamsın siyasi baxışları və keçmiş çıxışlarında sərgilədiyi radikal ritorika olub.
Panmalayziya İslam Partiyasının gənclər qanadının regional rəhbəri Məhəmməd Sukri Ömər bildirib ki, Adams “ekstremist və sionist baxışlara malikdir”. Onun fikrincə, bu cür bir şəxsin səfir kimi təyin olunması Malayziya xalqına qarşı hörmətsizlik olmaqla yanaşı, ölkənin Fələstin məsələsində tutduğu mövqeyə də ziddir.
Adamsın namizədliyinə qarşı çıxan digər şəxs – Xalq Ədalət Partiyasının gənclər qanadının nümayəndəsi Arif İzuaddin qeyd edib ki, Malayziyanın Vyana Konvensiyasına əsasən belə bir namizədliyi rədd etmək hüququ var.
“Bu addımı düşmənçilik jesti kimi yox, ikitərəfli münasibətlərin sağlam əsasda qorunması üçün vacib tədbir kimi dəyərləndirmək lazımdır” - deyə, o bildirib. Arif İzuaddin ABŞ səfirliyinə rəsmi etiraz notası göndərməyə hazırlaşdığını da bildirib.
Qeyd edək ki, ötən gün Amanah (Milli Etimad Partiyası) partiyasının gənclər bürosunun rəhbəri də bəyanatla çıxış edərək Adamsın təyinatını Malayziyanın xarici siyasət prinsiplərinə zidd və ölkənin ləyaqətinə xələl gətirən bir addım kimi qiymətləndirib.
Xatırladaq ki, 9 iyul tarixində Donald Tramp Nik Adamsı ABŞ-ın Malayziyadakı fövqəladə və səlahiyyətli səfiri postuna rəsmi olaraq namizəd kimi təqdim edib. Adams ABŞ vətəndaşlığı almış Avstraliya əsilli Sidneyin sabiq bələdiyyə şurası üzvüdür. O, MAGA (Make America Great Again – “Amerikanı yenidən möhtəşəm edək”) hərəkatının tərəfdarı, mühafizəkar "Liberty and American Greatness" fondunun qurucusu və bir neçə kitabın müəllifidir. Lakin onun diplomatik təcrübəsinin olmaması və aqressiv çıxışları cəmiyyətdə ciddi narahatlıq yaradıb.
