BAKI, AzerVoice
Ukraynaya birbaşa danışıqlar üçün təzyiq göstərilməlidir.
AzerVoice xəbər verir ki, Kremlin
sözçüsü Dmitri Peskov Qərb ölkələrini Ukraynaya birbaşa
danışıqların bərpası üçün təzyiq göstərməyə çağırıb.
O, Ukraynaya silah tədarükü ilə bağlı bəzi Avropa ölkələri arasında
fikir ayrılıqlarının olduğunu bildirib.
Moskvada jurnalistlərin suallarını cavablandıran Peskov, ABŞ-ın Avropa vasitəsilə Ukraynaya silah satışına dair qərarını şərh edərək, “Bu, sadəcə ticarətdir. Silahlar artıq daşınır. Məsələ onların pulunu kimin ödəyəcəyidir. İndi bəzi avropalılar ödəyəcək” - deyə bildirib. O, Fransa və Çexiya kimi ölkələrin ödəniş məsələsində tərəddüd etdiklərini də qeyd edib.
Peskov, Avropanın müharibənin davamına “militarist mövqel ilə” yaxınlaşdığını vurğulayaraq, bu tendensiyanın regionda sülhə mane olduğunu bildirib.
Almaniyanın Ukraynaya uzaqmənzilli “Toros” raketləri tədarük edə biləcəyi ehtimalına da münasibət bildirən Kremlin rəsmisi, ABŞ prezidenti Donald Trampın bu tip silahların göndərilməsinə qarşı olduğunu, Almaniyadan isə ziddiyyətli siqnallar gəldiyini deyib. “Bəzi sağlam düşüncə izlərini görmək mümkündür”, – deyə o qeyd edib.
Peskov əlavə edib ki, Rusiya prezidenti Vladimir Putin ilə ABŞ prezidenti Tramp arasında telefon danışığı hələ planlaşdırılmayıb, lakin belə bir görüş qısa müddətdə təşkil oluna bilər.
Ukraynanın birbaşa danışıqlara çağırılıb-çağırılmadığı ilə bağlı sualı cavablandıran Peskov, “Biz bu çağırışı bütün tərəflərə ünvanlayırıq. Tramp və komandası vasitəçiliyin əsas aktyorlarıdır. Bir çox bəyanat və məyusluq var. Ümid edirik ki, Ukrayna tərəfinə də paralel təzyiqlər göstərilir.” - deyə bildirib.
