BAKI, AzerVoice
Ukraynadakı münaqişə yalnız Rusiya və ABŞ prezidentlərinin görüşünün baş tutduğu halda həll oluna bilər.
AzerVoice xəbər verir ki, bu barədə Macarıstanın baş naziri Viktor Orban “Ultrahang” adlı YouTube kanalına verdiyi müsahibədə bildirib.
Orban qeyd edib ki, onun fikrincə, bu münaqişə Rusiya və ABŞ prezidentləri danışıqlar masasına əyləşib, razılaşmaya gəlməyincə başa çatmayacaq. Orbanın fikrincə, bu razılaşmalar yalnız Ukraynaya deyil, enerji daşıyıcılarının qiymətləri, Rusiya bazarlarına çıxış, iqtisadi sanksiyalar, silahlara nəzarət kimi məsələləri də əhatə edən genişmiqyaslı paket formasında olmalıdır.
Baş nazir bildirib ki, Rusiya və ABŞ arasında razılaşmanın ABŞ Prezidenti Donald Trampın verdiyi 50 günlük vaxt bitməmiş əldə ediləcəyinə və Trampın Rusiya və onun ticarət tərəfdaşlarına qarşı 100 faizlik idxal rüsumu tətbiq etmək hədəsinin qüvvəyə minməyəcəyinə ümid edir.
“Əgər bu baş versə, Macarıstan üçün problemlər yaranacaq” – deyə, Orban etiraf edib.
Ukrayna üzrə nizamlanma perspektivləri barədə danışarkən o qeyd edib ki, vəziyyət həm çətin, həm də qəribə görünür.
“Elə olmur ki, hamı sülh istəsin, amma sülh olmasın. Elə adamlar var ki, sülh istədiklərini deyirlər, amma əslində müharibə istəyirlər” – deyə, baş nazir vurğulayıb.
“Biz indi elə vəziyyətdəyik ki, Avropalılar və ukraynalılar, nə dediklərindən asılı olmayaraq, müharibənin davam etməsini istəyirlər. Mən hesab edirəm ki, ABŞ Prezidenti həqiqətən də sülh istəyir. Ruslara gəldikdə isə, onların nə istədiyini ən az biz bilirik. Amma əminik ki, onlar müəyyən etdikləri ərazi sərhədlərinə çatmağa çalışırlar” - deyə, o əlavə edib.
Orban onu da vurğulayıb ki, əsas məqsədi Macarıstanı Ukraynadakı münaqişəyə cəlb olunmaqdan qorumaq və sülh yolu ilə nizamlanmaya töhfə verməkdir. O xatırladıb ki, Rusiya və ABŞ prezidentləri ilə görüşlərində həmişə sülh naminə arqumentlər irəli sürməyə çalışıb.
Xatırladaq ki, bundan əvvəl Orban Ukraynanın Zakarpatya bölgəsindən olan 45 yaşlı etnik macar Jozef Sebestyenin zorla səfərbərlik zamanı döyülərək öldürüldüyünü iddia edərək, məsul ukraynalı hərbi liderlərin Avropa İttifaqının sanksiya siyahısına salınmasını tələb etmişdi.
