BAKI, AzerVoice
Ukraynada Prezident Volodimir Zelenskinin imzaladığı və Korrupsiyaya Qarşı Milli Mübarizə Bürosu (NABU) ilə Xüsusi Korrupsiya Prokurorluğunun (SAP) müstəqilliyini faktiki olaraq aradan qaldıran qanun səbəbilə etiraz aksiyaları yenidən başlayıb.
AzerVoice xəbər verir ki, bu barədə Ukrayna mətbuatı məlumat verib.
Məlumata görə, hazırda mitinqlər ölkənin Lvov, Rovno, Ternopol və Xarkov şəhərlərində keçirilir.
Xatırladaq ki, ötən gün Kiyevdə etirazçılar İvan Franko adına teatrın qarşısındakı meydanda toplaşaraq “NABU və SAP-dan əlinizi çəkin!” şüarları səsləndirirlər.
Qeyd edək ki, Ukrayna Ali Radası bu iki qurumun fəaliyyətini məhdudlaşdıran qanun layihəsini qəbul edib. Yeni qanuna əsasən, NABU və SAP artıq Baş Prokurorun qərarlarından asılı vəziyyətə düşür. Baş prokuror NABU-nun bütün istintaq işlərinə çıxış əldə edir, detektivlərə icrası məcburi göstərişlər verə və işlər üzrə istintaq səlahiyyətini dəyişə bilər.
NABU və SAP-a qarşı təzyiqlər bu qurumların bəzi əməkdaşlarına qarşı dövlətə xəyanət, Rusiya ilə əlaqələr və korrupsiya şübhələri ilə izah olunur.
"Financial Times" nəşrinin məlumatına görə, Fransa prezidenti Emmanuel Makron və Avropa Şurasının rəhbəri Antoniu Koşta Zelenski ilə əlaqə saxlayaraq onu bu qanuna dair qərarını yenidən nəzərdən keçirməyə çağırıblar.
