BAKI, AzerVoice
ABŞ yaxın zamanda Rusiya ilə nüvə silahlarının azaldılması perspektivlərini müzakirə etməyi planlaşdırır.
AzerVoice xəbər verir ki, bu barədə ABŞ Prezidenti Donald Tramp jurnalistlərin Vaşinqtonla Moskva arasında Strateji Hücum Silahlarının Azaldılması üzrə Müqaviləyə (START) alternativ yeni saziş bağlanması ilə bağlı sualını cavablandırarkən bildirib.
“Biz bu istiqamətdə işə başlayacağıq” – deyə o qeyd edib.
Tramp, həmçinin, START müqaviləsinin müddətinin başa çatmasının “dünya üçün problem” olduğunu vurğulayıb.
Qeyd edək ki, sənədin 10 il müddətinə qüvvədə qalması nəzərdə tutulurdu və bu müddət 5 fevral 2021-ci ildə bitirdi. Lakin sənəd qarşılıqlı razılıq əsasında uzadıla bilərdi. 2021-ci ilin fevralında Moskva və Vaşinqton bu sazişi maksimum müddət olan 5 il müddətinə (2026-cı ilin əvvəlinə qədər) uzatdılar.
ABŞ Prezidenti Donald Tramp, bu il yanvarın 20-də keçirilən inauqurasiyasından sonra Rusiya və Çin rəhbərliyi ilə yaxın zamanda nüvə silahlarının daha da məhdudlaşdırılması və azaldılması ilə bağlı danışıqlar aparmaq istədiyini dəfələrlə bəyan edib. Lakin hələlik bu istiqamətdə konkret təşəbbüs irəli sürülməyib.
Moskva və Vaşinqtonun, 2026-cı ilin əvvəlində müddəti bitəcək START müqaviləsinin əvəzində yeni sazişin hazırlanıb-hazırlanmayacağına dair qərar vermələri gözlənilir.
