BAKI, AzerVoice
BMT-nin “Fələstin məsələsinin sülh yolu ilə həlli və iki dövlətli həllin reallaşdırılması” mövzusunda təşkil etdiyi Yüksək Səviyyəli Beynəlxalq Konfransın yekun bəyanatı dərc olunub.
AzerVoice xəbər verir ki, bəyanata Türkiyə, Fransa, Səudiyyə Ərəbistanı, Braziliya, Kanada, Misir, İndoneziya, İrlandiya, İtaliya, Yaponiya, İordaniya, Meksika, Norveç, Qətər, Seneqal, İspaniya, Böyük Britaniya, Avropa İttifaqı və Ərəb Liqası da qoşulub.
Bəyanatda İsrailin Qəzzadakı mülki şəxslərə və infrastruktur obyektlərinə hücumları sərt şəkildə pislənib və bu hücumların dağıdıcı humanitar fəlakətə səbəb olduğu vurğulanıb.
Bəyanatda həmçinin, Qəzzadakı mülki əhalinin zorla köçürülməsi də daxil olmaqla, hər cür ərazi və ya demoqrafik dəyişikliklərə səbəb olan tədbirlər rədd edilib. İsrail-Fələstin münaqişəsinin həll yolu və iki dövlətli həllin tətbiqi, hər iki xalqın beynəlxalq hüquqa uyğun legitim tələblərinin yerinə yetirilməsinin yeganə yoludur. Bəyanatda zorakılığın, qeyri-dövlət aktorlarının sabitliyi pozan fəaliyyətlərinin və terrorun qarşısının alınması, həmçinin iki xalqın təhlükəsizliyi və dövlətlərinin suverenliyinin qorunması vurğulanıb. Bütün bunların regionda sülhün, rifahın və inteqrasiyanın təşviqi üçün ən uyğun yol olduğu qeyd edilib.
Bəyanatda Qəzzada müharibənin dərhal dayandırılması və İsrail qüvvələrinin tam şəkildə geri çəkilməsi tələb olunub. 1967-ci il sərhədləri əsasında, o cümlədən Qüds daxil olmaqla, Fələstin və İsrailin yanaşı, demokratik və suveren dövlətlər kimi sülh və təhlükəsizlik içində yaşaması prinsipinə tam dəstək ifadə olunub. Fələstin xalqının öz müqəddəratını təyin etmə hüququnun dəstəkləndiyi və Fələstin dövlətinin BMT-yə tam üzvlüyünün münaqişənin siyasi həllinin ayrılmaz tərkib hissəsi olduğu vurğulanıb.
İclasda Türkiyə rəsmiləri tərəfindən verilən şərhdə bildirilib ki, onilliklərdir davam edən İsrail təcrübələri nəzərə alındıqda, Fələstinli silahlı qrupların silahı buraxması yalnız müstəqil və suveren Fələstin dövlətinin 1967-ci il sərhədləri əsasında və paytaxtı Şərqi Qüds olmaqla qurulması ilə mümkündür. Həmçinin bu, Fələstinli qruplar arasında razılaşma ilə də formalaşa bilər.
Bundan əlavə, Qəzzada müvəqqəti fəaliyyət göstərəcək Keçid Dövrü İdarə Komitəsinin yaradılması, BMT-nin himayəsi altında və Təhlükəsizlik Şurasının mandatı ilə, mülki əhalinin qorunması, atəşkəsin təmin edilməsi, Fələstin idarəçiliyinin yenidən bərpası və Fələstin təhlükəsizlik qüvvələrinə dəstəyin verilməsi məqsədilə beynəlxalq sabitlik missiyasının yerləşdirilməsi təklif edilib.
Qeyd edək ki, Fələstin BMT-nin 148 üzv dövləti tərəfindən tanınıb. 95 ölkədə Fələstinin səfirlikləri və daimi nümayəndəlikləri fəaliyyət göstərir. “İki dövlət – iki xalq üçün” prinsipi 1967-ci il sərhədləri daxilində, paytaxtı Şərqi Qüds olan müstəqil Fələstin dövlətinin yaradılmasını nəzərdə tutur.
