BAKI, AzerVoice, Səməd Əyyubov – Avropa İttifaqı (Aİ) ABŞ Prezidenti Donald Trampla əldə olunan ticarət razılaşmasından sonra ABŞ-a qarşı nəzərdə tutulmuş 93 milyard avro həcmində cavab rüsumlarını tam ləğv etməyib, yalnız yarım il müddətinə dondurub.
AzerVoice xəbər verir ki, bu barədə Avropa Komissiyasının mətbuat xidməti məlumat yayıb.
Bildirilib ki, 27 iyul razılaşması çərçivəsində ABŞ-la birlikdə gömrük rüsumları ilə bağlı birgə bəyanatın icrası üzərində iş davam etdirilir. Bu məqsədlə, avqustun 7-də qüvvəyə minməsi nəzərdə tutulan cavab tədbirlərinin dayandırılması barədə qərar qəbul edilib.
Qeyd edək ki, Avropa Komissiyasının hazırladığı cavab tədbirləri iki paketdən ibarət idi: ABŞ-ın polad və alüminiuma tətbiq etdiyi rüsumlara cavab olaraq 21 milyard avro dəyərində idxal mallarına rüsum tətbiqi və avqustun 1-dən ABŞ-ın Aİ-dən bütün idxalata 30 faizlik tarif tətbiq etməsi halında əlavə 72 milyard avro dəyərində rüsumların qüvvəyə minməsi planlaşdırılırdı.
Bu tədbirlərin ləğv edilməyib, yalnız dondurulması o deməkdir ki, əgər ABŞ-ın Avropa mallarına tətbiq etdiyi gömrük rüsumları 15 faizi keçərsə, Aİ bu tədbirləri yenidən gündəmə gətirə bilər.
İyulun 27-də əldə edilən razılaşmaya əsasən, ABŞ rüsumları 30 faizdən 15 faizə endirəcək, əvəzində Aİ cavab tədbirlərini tətbiq etməyəcək, üç il ərzində ABŞ-dan 750 milyard dollar dəyərində enerji resursları və AES avadanlıqları alacaq, ABŞ iqtisadiyyatına 600 milyard dollar sərmayə qoyacaq və orada iri həcmdə hərbi sifarişlər yerləşdirəcək.
