BAKI, Azervoice, Nərmin Ağayeva
ABŞ prezidenti Donald Tramp İsrailin Qəzza zolağını tam işğal planı ilə bağlı mövqe bildirməkdən imtina edərək, əsas diqqəti bölgəyə humanitar yardım çatdırılmasına yönəltdiyini deyib.
Azervoice xəbər verir ki, Ağ Evdə keçirilən imza mərasimində çıxış edən Tramp İsrailin Qəzzaya müdaxilə planına dair suala cavabında “Hazırda Qəzzadakı insanlara ərzaq çatdırmağa çalışırıq. Diqqətimi buna yönəltmişəm. Qalan məsələlərə gəlincə, bu, İsrailin ixtiyarındadır” - deyə bildirib.
Tramp həmçinin Yaxın Şərq üzrə xüsusi nümayəndəsi Stiv Vitkoffun Moskvada Rusiya tərəfi ilə görüş keçirəcəyini xatırladaraq, enerji tarifləri və digər geosiyasi məsələlərlə bağlı qərarların bu görüşdən sonra veriləcəyini bildirib. Ukrayna müharibəsinə münasibətində isə Tramp məsuliyyəti Co Baydenin üzərinə qoyaraq, “Bu müharibə mənim deyil, Baydenin müharibəsidir. Mən ABŞ-ı bu qarışıqlıqdan çıxarmaq üçün buradayam” deyib.
ABŞ lideri son 5 ayda 5 münaqişənin sona çatmasına nail olduğunu və Rusiya-Ukrayna müharibəsinin də altıncı ola biləcəyini vurğulayıb. Tramp, Qəzza əhalisinin ərzaq təminatı ilə bağlı isə “Qəzza xalqının yeməklə vəziyyəti yaxşı deyil. Biz 60 milyon dollarlıq yardım göndərmişik, İsrail paylama və maliyyə dəstəyi göstərəcək, ərəb ölkələri də bu prosesdə iştirak edəcək” - deyə əlavə edib.
Qeyd edək ki, Qəzza zolağında İsrailin hərbi əməliyyatları nəticəsində humanitar böhran dərinləşməkdə davam edir. Son 24 saatda aclıq səbəbindən daha 8 nəfərin həlak olduğu bildirilir.
