BAKI, AzerVoice, Səməd Əyyubov – ABŞ Prezidenti Donald Tramp və onun administrasiyası böyük ehtimalla Çinlə razılığa gələrək gömrük rüsumları ilə bağlı mövcud razılaşmaların müddətini 90 gün uzadacaq.
AzerVoice xəbər verir ki, bu barədə ABŞ-ın ticarət naziri Hovard Latnik “Fox Business” telekanalına müsahibəsində bildirib.
“Görünür ki, Tramp və ABŞ-ın danışıqlar heyəti razılığa gələcək və həmin razılaşmaların müddətini 90 gün uzadacaqlar” – deyə, o bildirib. Eyni zamanda, o qeyd edib ki, bu məsələ ilə bağlı yekun qərarı ABŞ prezidenti verəcək.
ABŞ və Çin arasında ikitərəfli ticarətlə bağlı növbəti danışıqlar raundu 28–29 iyul tarixlərində Stokholmda baş tutub. Lakin tərəflər əlavə idxal rüsumlarının dayandırılmasının müddətinin uzadılması məsələsində hələ də fərqli mövqelər nümayiş etdirirlər. Çin tərəfi bu müddətin uzadılması ilə bağlı razılıq əldə olunduğunu bildirsə də, ABŞ-ın maliyyə naziri Skott Bessent bütün şərtlərin əvvəlcə Tramp tərəfindən təsdiqlənməli olduğunu vurğulayıb.
Qeyd edək ki, ABŞ və Çin nümayəndələri arasında 10–11 may tarixlərində Cenevrədə keçirilən danışıqların nəticəsi olaraq, mayın 12-dən etibarən qarşılıqlı şəkildə 90 gün müddətinə idxal rüsumlarının 115 faiz azaldılması (Çindən ABŞ-a gətirilən mallar üçün rüsumun 30 faizə, ABŞ-dan Çinə gətirilən mallar üçün isə 10 faizə endirilməsi) barədə razılıq əldə edilmişdi. Bu razılaşmanın müddəti avqustun 12-də başa çatır.
