BAKI, AzerVoice, Səməd Əyyubov
İsrailin Qəzza zolağı ilə bağlı planları qınama ilə qarşılanır, onların həyata keçirilməsi bölgədəki vəziyyəti daha da gərginləşdirə bilər.
AzerVoice xəbər verir ki, bu barədə Rusiya Xarici İşlər Nazirliyinin bəyanatında qeyd olunub.
“Gözlənilir ki, yaxın vaxtlarda Qəzzada bir nəfər də olsun dinc sakin qalmayacaq. Onların hamısı zorla köçürüləcək. İsrail tərəfi işğal niyyətini gizlətmir” - deyə, Nazirlik vurğulayıb.
“Belə planların həyata keçirilməsi, qınama ilə qarşılanmaqla yanaşı, Qəzzadakı son dərəcə ağır vəziyyəti daha da pisləşdirə bilər” - deyə, bəyanatda bildirilib.
Rusiya, fələstin məsələsinin beynəlxalq hüquqa əsaslanan və mərkəzində iki dövlət prinsipinin dayandığı həll yolunun alternativsiz olduğunu vurğulayıb. Bu prinsip müstəqil Fələstin dövlətinin yaradılmasını nəzərdə tutur.
“Rusiya Qəzza zolağında dərhal atəşkəsin təmin edilməsi, bütün girovların azad olunması, eləcə də humanitar yardımın maneəsiz çatdırılmasının bərpası ilə bağlı mövqeyini dəyişmir. Moskva fələstin məsələsinin, 1967-ci il sərhədləri daxilində paytaxtı Şərqi Qüds olan müstəqil Fələstin dövlətinin yaradılmasını nəzərdə tutan, beynəlxalq hüquqa əsaslanan iki dövlət prinsipindən başqa alternativi olmadığına əmindir” - deyə, bəyanatda qeyd edilib.
Bəyanatda həmçinin vurğulanıb ki, İsrailin Qəzza zolağını işğal planı regionda gərginliyin azaldılması istiqamətində bütün səyləri çətinləşdirəcək və bu, bütün Yaxın Şərq üçün mənfi nəticələrə səbəb olacaq.
Qeyd edək ki, İsrail Təhlükəsizlik Kabineti Qəzza şəhərinin işğalı ilə bağlı yeni planı təsdiqləyib. Bu qərar bölgədə gərginliyi daha da artırıb və beynəlxalq aləmdə, o cümlədən Türkiyə və Almaniyada kəskin reaksiyalara səbəb olub.
