BAKI, AzerVoice, Səməd Əyyubov
24 ölkənin xarici işlər nazirləri və üç Avropa Komissarı Qəzza zolağında humanitar vəziyyətin kritik həddə çatdığını bildirərək, İsraili ehtiyacı olan insanlara humanitar yardımın çatdırılmasına icazə verməyə çağırıblar.
AzerVoice xəbər verir ki, bu haqda Böyük Britaniya Xarici İşlər Nazirliyi tərəfindən yayılan bəyanatda qeyd olunub.
“Qəzzadakı humanitar vəziyyət təsəvvürolunmaz səviyyəyə çatıb. Aclığın yayılmasını dayandırmaq üçün təcili tədbirlər görülməlidir” - deyə, bəyanatda vurğulanıb.
Sənədə Avstraliya, Belçika, Böyük Britaniya, Yunanıstan, Danimarka, Avropa İttifaqı (Aİ), İrlandiya, İslandiya, İspaniya, Kanada, Kipr, Lüksemburq, Litva, Malta, Niderland, Norveç, Portuqaliya, Slovakiya, Sloveniya, Finlandiya, Fransa, İsveçrə, İsveç, Estoniya və Yaponiyanın xarici işlər nazirləri, həmçinin Aralıq dənizi məsələləri üzrə Avropa Komissarı Dubravka Şuitsa və fövqəladə hallar üzrə Avropa Komissarı Adja Labib imza atıblar.
“Biz İsrail hökumətini beynəlxalq QHT-lərin bütün humanitar yüklərinə icazə verməyə və əsas humanitar təşkilatların fəaliyyətinə mane olan məhdudiyyətləri aradan qaldırmağa çağırırıq. Biz müharibəni dayandıracaq atəşkəsə, girovların azad edilməsinə və humanitar yardımın Qəzza zolağına maneəsiz çatdırılmasına ehtiyac duyuruq” - deyə, sənəddə qeyd olunub.
Qeyd edək ki, martın 2-dən etibarən Qəzzaya beynəlxalq humanitar yardım daxil olmur. İsrailin qərarı ilə bölgəyə giriş-çıxışa nəzarət edən bütün keçid məntəqələri bağlanıb. Hazırda ərzaq yardımı yalnız İsrail və ABŞ-ın nəzarətindəki “Qəzza Humanitar Yardım Fondu” vasitəsilə paylanır.
Mart ayında İsrail ordusu atəşkəsi pozaraq Qəzzada hərbi əməliyyatlara yenidən başlayıb. Qətər, Misir və ABŞ-ın vasitəçiliyi ilə aparılan danışıqlarda hələlik yeni atəşkəs razılaşmasına nail olunmayıb.
