BAKI, AzerVoice, Nərmin Ağayeva
Melaniya Tramp keçmiş prezident Co Baydenin oğlu Hunter Baydeni məhkəməyə verməklə hədələyir
AzerVoice xəbər verir ki, ABŞ-ın birinci xanımı Melaniya Tramp, keçmiş prezident Co Baydenin oğlu Hunter Baydeni, cinsi istismarda ittiham olunan iş adamı Cefri Epşteynin onu Donald Trampla tanış etdiyinə dair iddialara görə məhkəməyə verməklə hədələyib.
“Asharq Al-Awsat”ın BBC-yə istinadən yaydığı məlumata görə, 2005-ci ildə Donald Trampla evlənən Melaniya Trampın vəkilləri bu iddianı “yalan, böhtan və mübahisəli” adlandırıblar. Hunter Baydenin vəkilinə göndərilən məktubda iddianın dərhal geri götürülməsi və üzr istənilməsi tələb olunub. Əks halda, 1 milyard dollardan çox təzminat tələb ediləcəyi bildirilib.
Məktubda qeyd olunub ki, Hunter Baydenin təkrar-təkrar səsləndirdiyi iddialar Melaniya Trampın nüfuzuna ciddi ziyan vurub və maddi zərər yetirib.
Xatırladaq ki, Hunter Bayden bu ayın əvvəlində verdiyi müsahibədə Donald Trampın Epşteynlə münasibətlərini kəskin tənqid edib. Donald Tramp isə Epşteynlə dost olduqlarını, lakin 2000-ci illərin əvvəllərində fikir ayrılığı yaşadıqlarını və bunun səbəbinin Floridadakı qolf klubunda işləyən gənc qadınların “oğurlanması” olduğunu bildirib.
Cefri Epşteyn 2019-cu il avqustun 10-da Nyu-Yorkda saxlandığı kamerada ölü tapılıb. Onun ölümü rəsmi olaraq intihar kimi qeydə alınıb.
