BAKI, AzerVoice, Səməd Əyyubov
ABŞ, Avropa ölkələri və Ukrayna Kiyevə təhlükəsizlik təminatları ilə bağlı təklif hazırlamaq üçün xüsusi komissiya yaradıb.
AzerVoice xəbər verir ki, bu barədə “Axios” portalı mənbələrə istinadən məlumat yayıb.
Məlumata görə, yaxın günlərdə ABŞ, Ukrayna və bir sıra Avropa ölkələrindən yüksək vəzifəli nümayəndələr təhlükəsizlik təminatları ilə bağlı ətraflı təklif üzərində işləyəcəklər. Mənbələrin bildirdiyinə görə, komissiyaya ABŞ dövlət katibi Marko Rubio rəhbərlik edəcək.
Portal yazır ki, ABŞ prezidenti Donald Tramp avqustun 18-də Rusiya prezidenti Vladimir Putinlə telefon danışığı zamanı onun Ukrayna prezidenti Volodimir Zelenski ilə görüşməsinin vacibliyini vurğulayıb. Bildirilir ki, Tramp Putini bu məsələlərin müzakirəsində “realist mövqe sərgiləməyə” çağırıb.
Tramp daha əvvəl bəyan etmişdi ki, Ukraynaya veriləcək təhlükəsizlik təminatları NATO-nun birbaşa müdafiəsini nəzərdə tutmayacaq. Bununla belə, o, ABŞ-ın Avropaya, xüsusilə hava məkanının qorunması ilə bağlı dəstək verməyə hazır olduğunu qeyd edib, lakin detalları açıqlamayıb.
Xatırladaq ki, avqustun 18-də Ağ Evdə Donald Tramp, Volodimir Zelenski, Finlandiya prezidenti Aleksander Stubb, Fransa prezidenti Emmanuel Makron, Böyük Britaniya baş naziri Kir Starmer, Almaniya kansleri Fridrix Mers, İtaliya baş naziri Corcia Meloni, Avropa Komissiyasının rəhbəri Ursula fon der Lyayen və NATO baş katibi Mark Rütte arasında görüş keçirilib. ABŞ lideri bunun ilk dəfə belə geniş tərkibdə təşkil olunduğunu və mövzunun əhəmiyyətini göstərdiyini vurğulayıb.
Görüş zamanı Tramp həmçinin Vladimir Putinlə də telefonla danışıb. Ağ Evin məlumatına görə, tərəflər Putinlə Zelenski arasında mümkün görüşü, eləcə də üçtərəfli danışıqlar imkanlarını müzakirə ediblər. Rusiya prezidentinin köməkçisi Yuri Uşakov isə bildirib ki, Vaşinqton və Moskva Kiyev ilə birbaşa məsləhətləşmələrin davam etdirilməsini dəstəkləyib və onların daha yüksək səviyyədə keçirilməsi variantını nəzərdən keçirib.
