BAKI, AzerVoice, Nərmin Ağayeva
Almaniyada əhalinin əksəriyyəti İsrailə silah ixracının dayandırılmasını dəstəkləyir.
AzerVoice xəbər verir ki, ictimai rəy sorğusu şirkəti YouGov tərəfindən keçirilən sorğuya əsasən, almanların 65 faizi hökumətin Qəzza zolağında istifadə oluna biləcək silahların İsrailə ixracını dayandırmasını düzgün addım hesab edir.
Məlumata görə, respondentlərin 19 faizi bu qərarı yanlış qiymətləndirib, 16 faizi isə mövzu ilə bağlı rəy bildirmək istəməyib. Sorğu həmçinin Almaniya hökumətinin Avropa İttifaqı–İsrail Assosiasiya Sazişinin dayandırılmasına qarşı mövqeyi ilə bağlı cəmiyyətin baxışlarını da üzə çıxarıb. Belə ki, iştirakçıların 45 faizi bunu doğru addım, 32 faizi isə yanlış qərar hesab edib, 23 faizi isə şərh verməyib.
Qeyd edək ki, İsrail Təhlükəsizlik Kabineti Qəzza zolağının şimalının işğalına dair yeni planı təsdiqlədikdən sonra Almaniya kansleri Fridrix Merz avqustun 8-də İsrailə silah ixracının dayandırılacağını açıqlamışdı.
